माओवादीका केन्द्रीयसहित ८ नेताकार्यकर्ता पक्राउ

Best Khabar Team | २०७५ चैत्र ९ गते शनिबार

२३ मार्च, २०१९
काठमाडौं । नेत्र विक्रम चन्द नेतृत्वको नेकपा माओवादीका केन्द्रीय नेतासहित ८ जना कार्यकर्तालाई प्रहरीले पक्राउ गरेको छ । प्रहरीको विशेष व्युरोका अनुसार चन्द नेतृत्वको माओवादीका नेताहरुले ललितपुरको नख्खुमा रहेको एन सेल अगाडि विस्फोट गराएको सुचनाको आधारमा उनीहरुको खोजी तीव्र बनाएको थियो ।

यही क्रममा प्रहरीले माओवादीको मध्य कमाण्ड इञ्चार्ज हेमन्तप्रकाश ओलीसहित अन्य नेता तथा कार्यकर्तालाई काभ्रेबाट पक्राउ गरेको हो । पक्राउ पर्नेमा धर्मराज राजबाहक, रामकृष्ण खतिवडा, शंकर अधिकारी, विजय श्रेष्ठ, ललित तामाङ, सञ्जीव कार्की, देव घिमिरे र लोकेन्द्र खड्का रहेका छन् ।

ओली माओवादीका तेश्रो बरियताका नेता रहेको बताइएको छ । पक्राउ परेकाहरु सबै माओवादीमा संलग्न रहेको बताइएको छ । प्रहरीको अपराध महाशाखा, विशेष ब्युरो र काभ्रे प्रहरीको संयुक्त टोलीको संयुक्त अपरेशनबाट उनीहरुलाई पक्राउ गर्न सफल भएको प्रहरीले जनाएको छ । पक्राउ परेका ओली नख्खुस्थित एनसेल कार्यालय अगाडि विस्फोट गराउने मुख्य योजनाकार रहेको बताइएको छ ।

उनकै नेतृत्वमा विभिन्न स्थानमा माओवादीले विस्फोट गराएको प्रहरी स्रोतको दाबी छ । उनलाई प्रहरीले कर्तव्य ज्यान मुद्दा चलाउने तयारी गरेको छ । उनले नेतृत्व गरेको विस्फोटका कारण ललितपुरको नख्खुमा १ जनाको मृत्यु भएको थियो भने अन्य ३ जना घाइते भएका थिए ।