साढे तीन महिनादेखि हिमालमा हराईरहेका सातै जनाको शव भेटियो

Best Khabar Team | २०७७ बैशाख २० गते शनिबार

०२ मे, २०२०
पोखरा । नेपाली सेनाले विगत साढे ३ महिना अघिदेखि कास्कीको अन्नपूर्ण क्षेत्रमा गएको हिमपहिरोमा परी हराईहरेका ७ जनाकै शव निकालेको छ । अन्नपूर्ण पदयात्राका क्रममा गएको हिम पहिरोमा परी हराईरहेका चार कोरियाली पर्यटक तथा उनका सहयोगका लागि गएका नेपाली गाईड तथा सहयोगीको शव नेपाली सेनाको रेस्क्यु विशेषज्ञको टोलीले हिउँबाट निकालेको हो । गत माघमा सो क्षेत्रमा एक्कासी गएको हिम पहिरोमा परी ४ कोरियाली पर्यटक र उनीहरुका ३ जना नेपाली सहयोगी हराईरहेका थिए ।

पछि हिमपहिरोमा परी उनीहरुको ज्यान गएको पुष्टि भएपनि हिउँ पन्छाएर शव निकाल्न सकिएको थिएन । तर नेपाली सेनाको विशेषज्ञहरुको टोलीले अन्नपूर्ण गाउँपालिका वडा नम्बर ११ स्थित हिङक् केभ क्षेत्रमा विगत केही महिनादेखि निरन्तर रुपमा गरेको प्रयासबाट सो घटनामा हराईरहेका सबैको शव निकाल्न सफल भएको हो । पछिल्लो पटक हिजो एक कोरियाली पर्यटक र एक नेपाली गाईडको शव निकालिएको नेपाली सेनाको पश्चिम पृतना कार्यालय पोखराले जनाएको छ ।

गएको माघ ३ गते अन्नपूर्ण पदमार्गको सो क्षेत्रमा गएको हिउँ पहिरोमा ३ जना नेपाली गाईड र ४ जना कोरियन पर्यटक गरी ७ जना वेपत्ता भएसँगै उनीहरुको निरन्तर रुपमा खोजी कार्य जारी राखिएको थियो । तर हालसम्म २ जना नेपाली गाईड र ३ जना कोरियन पर्यटकहरुको मात्रै शव फेला परेको भएपनि हिजो थप २ जनाको शव फेला सँगै सो घटनामा हराईरहेका सबैको शव प्राप्त भै सकेको छ ।

Comment from facebook