सुन तस्करी प्रकरण : पूर्व सभामुख महराका छोरा राहुललाई पुर्पक्षका लागि कारागार पठाउन आदेश

Best Khabar Team | २०८० आश्विन २६ गते शुक्रबार

१३ अक्टोबर, २०२३
काठमाडौं । काठमाडौं जिल्ला अदालतले पूर्वसभामुख कृष्णबहादुर महराका छोरा राहुल महरालाई जेल चलान गर्न आदेश दिएको छ । विद्युतीय चुरोट(भेप)मा राखेर लुकाइछिपाई ल्याइएको करिब ९ किलो सुन तस्करीको प्रकरणसँग जोडिएका राहुललाई आज जिल्ला अदालतले पुर्पक्षका लागि कारागार चलान गर्न निर्देशन दिएको हो ।

***पूर्वसभामुख महराका छोरा राहुल महरा ।***

काठमाडौं जिल्ला अदालतका न्यायधीश डण्डपाणि शर्माको इजलासले यो मुद्दाको किनारा नलागेसम्म राहुललाई जेल चलाउन गर्न आदेश दिएको हो । यस्तै घटनामा संलग्न अर्का प्रतिवादी लोकेन्द्र पौडेललाई धरौटीमा छाड्न आदेश दिइएको छ । अदालतका सुचना अधिकारी दीपक दाहालका अनुसार पौडेलालाई ५ लाख रुपैंयाँ धरौटीमा छाड्नका लागि आदेश भएको हो । आजको थुनछेक बहसपछि अदालतले यो निर्णय लिएको हो ।

गत वर्षको पुस १० गते मा दुबईबाट विद्युतीय चुरोटमा लुकाएर चिनियाँ नागरिकको मिलेमतोमा नेपाल भित्र्¥याइएको करिब ९ किलो अबैध सुन प्रकरणमा राहुल केही महिनाअघि पक्राउ परेका थिए । यद्यपि यो प्रकरणलाई थामथुम पार्न पूर्व सभामुख महराले पनि भन्सारका कर्मचारीलाई फोन गरेर पटक पटक दबाब दिएको तथ्य सार्वजनिक भएको थियो । अदालतले यो प्रकरणमा मुछिएका महरालाई भने उन्मुक्ति दिएको छ ।