नेपालकी पहिलो महिला प्रधानमन्त्री कार्कीको अबको दायित्व

Best Khabar Team | २०८२ भाद्र २८ गते शनिबार

नेपालको इतिहाँसमा पहिलो पटक महिला प्रधानमन्त्रीको रुपमा पूर्वप्रधानन्यायधीश सुशीला कार्की नियुक्त भएकी छन् । राष्ट्रपति रामचन्द्र पौडेलले उनलाई पद तथा गोपनियताको सपथ गराएका हुन् । जेनजीको आन्दोलनबाट निवर्तमान प्रधानमन्त्री केपी शर्मा ओली नेतृत्वको सरकार सत्ताच्यूत भएपछि कार्कीलाई प्रधानमन्त्री नियुक्त गरिएको थियो । जेनजी नेतृत्वमा भएको आन्दोलनमा काठमाडौंलगायत देशभर व्यापकरुपमा जनधनको क्षतिभएलगत्तै प्रधानमन्त्री बनेकी सुशीला कार्कीको काँधमा ठूलो जिम्मेवारी थपिएको छ । भ्रष्टाचार र अनियमितताबाट आक्रान्त बनेका नेपाली जनतामा सकारात्मक सन्देश प्रवाह गर्नका लागि कार्की नेतृत्वको सरकारले महत्वपूर्ण भूमिका निर्वाह गर्नुपर्ने अपरिहार्य बनेको छ । यस्तै आन्दोलनरत जेनजीको मागलाई सम्बोधन गर्ने, वर्तमान राजनीतिक शक्तिहरु समेत मिलाउँदै अघि बढ्नुपर्ने चुनौती कार्की नेतृत्वको सरकारमा छ । त्यसो त अहिले सबै मन्त्रालयको जिम्मेवारी कार्कीकै पोल्टामा रहेपनि केहीदिनभित्रै मन्त्रीमण्डल विस्तार हुनेछ ।

योसँगै आम जनताले सोचे अनुसारको परिवर्तनको प्रत्याभूति, शान्ति सुरक्षा, अमनचयन, भ्रष्टाचारीहरुलाई कारबाही, विधिको शासन, विकास निर्माण तथा आन्दोलनबाट क्षतिग्रस्त सरकारी संरचनाको निर्माण सरकारको पहिलो दात्यिव हुन आउँछ । यसका अलावा अबको ६ महिनापछिका लागि घोषित गरिएको आम निर्वाचनको तयारीमा पनि सरकार अविलम्ब लाग्नुपर्ने जिम्मेवारी वर्तमान सरकारको सामू छ । पहिलो प्रधानन्यायीश बनेर नेपालको इतिहाँसमा नाम लेखाउन सफल कार्कीले नेपालको पहिलो महिला प्रधानमन्त्रीको रुपमा समेत रेकर्ड राख्न सफल भएकी छन् ।

तर उनले युद्धस्तरमै अबका दिनमा निर्वाचनको तयारीका लागि लाग्नुपर्ने र आवश्यक कानुनी प्रक्रिया अघिढाउनुपर्ने दायित्व निर्वाह गर्नुपर्ने देखिन्छ । त्यसका लागि उनले सबै राजनीतिक दल, नागरिक समाजलगायतसँग छलफल गरी अघि बढ्नुपर्ने हुन्छ। साथै न्यायपालिकामा रहँदा देखाएको हक्की र इमानदार स्वभावलाई प्रधानमन्त्रीको रुपमा पनि जिवितै राख्नुपर्ने दात्यिव कार्कीको काँधमा रहेको ।

अबको छ महिनापछि हुन लागेको आम निर्वाचनबाट निर्वाचित भएर आउने नयाँ नेतृत्वलाई पद हस्तान्तरण गर्नुअघि कार्कीले देश र जनताले प्रत्यक्ष देखिने गरी काम गर्नुपर्ने हुन्छ । त्यसका लागि उनले आजदेखि नै मन्त्रीमण्डल विस्तारको लागि छलफल शुरु गरिसकेकी छन् । यस्तै आन्दोलनका क्रममा घाइते भै अस्पतालमा उपचार गराईरहेका जेनजीका युवाहरुसँग पनि उनले आज स्वास्थ्य अवस्था बारे जानकारी लिएकी थिइन् । ती युवाहरुले पनि आन्दोलनको म्यान्डेटबाट बाहिर नगैकन काम गर्न कार्कीमार्फत् वर्तमान सरकारलाई अस्पतालबाटै खबरदारी गरेका छन् । यस्तै जेनजीलगायत नागरिक समाज, बुद्धिजीविलगायतसँग छलफल गरी सर्बसम्मत खालको मन्त्रीमण्डल विस्तार गरी काम अघि बढाउन पनि ढिलाई गर्नुहुँदैन ।