बंगलादेशमा प्रशिक्षणमा रहेको बायुसेनाको विमान दुर्घटना, १९ को मृत्यु, १६५ जना घाइते

Best Khabar Team | २०८२ श्रावण ५ गते सोमबार

ढाका, बंगलादेश । बंगलादेशको राजधानी ढाकामा स्थानीय बायु सेनाको विमान दुर्घटना हुँदा १९ जनाको ज्यान गएको छ । प्रशिक्षणमा रहेको सो विमान दुर्घटनामा परी विमान चालकको समेत मृत्यु भएको स्थानीय सञ्चारमाध्यमहरुले जनाएका छन् । बायु सेनाको एफ–सेभेन कल साईन भएको सो जेट विमान दुर्घटना ढाकाको माइलस्टोन क्याम्पसको हातामा प्राविधिक कारणले दुर्घटनामा परेको बताइएको छ ।

दियाबारी क्षेत्रमा रहेको सो क्याम्पसमा पढाई सक्किएर छुट्टिहुने बेलामा विद्यार्थीहरु कक्षाकोठाबाट बाहिरिइरहेका बेलामा एक्कासी विमान क्याम्पसको परिसरमा खसेको थियो । सो दुर्घटनामा परी १ सय ६५ जना भन्दा बढी घाइते भएका छन् । विमान दुर्घटनामा परी घाइते तथा मत्यु हुनेमा धेरैजसो सो क्याम्पसमा अध्ययनरत विद्यार्थी रहेको स्थानीय सञ्चारमाध्यमले जानकारी दिएका छन् । घाइतेहरुको स्थानीय अस्पतालमा उपचार भैरहेको छ ।

घाइतेमध्ये कतिपयको अवस्था गम्भीर रहेको बताइएको छ । दुर्घटनाको अनुसन्धान गर्न सेनाले समिति समेत गठन समेत गरेको छ । विमान दुर्घटनामा परी १९ जनाको मृत्यु तथा १६५ भन्दा बढी घाइते भएको घटनापछि सरकारले बंगलादेशमा मंगलबार राष्ट्रिय शोकको घोषणा गरेको छ ।