कोरोना संक्रमण नियन्त्रणको पूर्वतयारी : चीनलगायत ५ देशका नागरिकलाई काठमाडौं विमानस्थलमा भिषा नदिइने

Best Khabar Team | २०७६ फाल्गुन २० गते मंगलबार

०३ मार्च, २०२०
काठमाडौं । सरकारले कोरोना भाइरस संक्रमणको नियन्त्रणको पूर्व तयारी थालेको छ । यसको लागि विमानस्थलमा विशेष स्वास्थ्य सुरक्षा सर्तकता अपनाउन थालिएको छ भने अध्यागमन विभागले विभिन्न देशका नागरिकलाई तत्काल नेपाल प्रवेशमा दिईँदै आएको अन अराइभल भिसा बन्द गर्ने निर्णय गरेको छ ।

विभागका अनुसार कोरोनाबाट बढी प्रभावित मुलुकहरुका नागरिकलाई विमानस्थलमा तत्काल दिइँदै आइएको अन अराइभल भिषा रोक्ने निर्णय सरकारले गरेको हो । यद्यपि सम्बन्धित देशमा रहेका कुटनीतिक नियोगबाट भने अत्यावश्यक अवस्थामा भिषा लिएर नेपाल आउन सकिने विभागले जनाएको छ ।

यो नियम यही मार्च ६ तारिखबाट लागु हुनेछ । आगामी मार्च ३१ गतेसम्मका लागि भन्दै विभागले कोरोना भाइरसबाट अतिप्रभावित चीन, दक्षिण कोरिया, जापान, इरान र इटलीका नागरिकलाई काठमाडौं विमानस्थलमा दिईँदै आएको अन अराईभल भिषा नदिने निर्णय गरेको हो ।

सरकारले हालै भ्रमणवर्ष २०२० स्थगित भएको घोषणा गरेसँगै यो नयाँ निर्णयले नेपाल आउने पर्यटकको संख्या ह्वात्तै घट्ने देखिन्छ । अहिले काठमाडौको ठमेल, बसन्तपुर, लाजिम्पाटलगायतका क्षेत्र र पाटन, भक्तपुरलगायतका स्थानमा पनि पर्यटकहरुको चहलपहल सुनसान जस्तै बनेको छ ।