बेलायतमा नयाँ प्रकारको कोरोना संक्रमण देखिएसँगै युरोपका अधिकांश देशद्वारा हवाई उडानमा रोक

Best Khabar Team | २०७७ पुष ७ गते मंगलबार

२२डिसेम्बर, २०२०
वेस्टह्याम, लण्डन । पछिल्ला दिनहरुमा कोरोना भाइसरका कडा लक्षणसहितका संक्रमितको संख्या देखिएपछि लण्डनबाट युरोपका प्राय सबै देशमा हुने उडानहरु अनिश्चितकालका लागि बन्द गरिएको छ । विगत केहीदिनयता बेलायतको दक्षिण पूर्वी क्षेत्रमा कोरोना भाइरसको संक्रमणमा परेका र कडा प्रकृतिका लक्षणसहितका संक्रमितहरुको संख्या बढ्न थालेपछि युरोपेली युनियनले यहाँबाट हने सबै यात्रुबाहक विमानहरु रोक्ने निर्णय गरेको हो ।

यो निर्णयसँगै युरोपका अधिकांश देशहरुमा बेलायतबाट हुने हवाई उडान गएराति १२ बजेपछि बन्द भएको छ । कतिपय युरोपेली देशले आफ्नो देशका नागरिकलाई पिसिआर रिपोर्टसहित प्रवेश गर्न दिने बताएपनि अनिवार्य रुपमा केहीसाता आइसोलेसनमा बस्नुपर्ने बाध्यकारी प्रावधान अघि सारेको छ । विगत केहदिनयता लण्डनका विभिन्न क्षेत्रमा कडा प्रकृतिका कोरोनाका विरामीहरु देखिन थालेपछि अहिले यसको व्यवस्थापन स्वास्थ्यकर्मीहरुका लागि थप चुनौतीपूर्ण बनेको छ ।

कोरोनाको भ्याक्सिन प्रयोगमा आएपनि अहिले दक्षिणी लण्डनमा देखिएका कोरोना संक्रमितको अवस्था र यसको फैलँदो रुपले भोलिका दिनमा ल्याउनसक्ने गम्भीर परिणामलाई मध्यनजर गर्दै बेलायतबाट हुने सबै उडानहरुमा रोक लगाइएको युरोपेली युनियनको भनाई छ । युरोपेली युनियनको यो निर्णयसँगै क्रिशमस तथा अँग्रेजी नयाँ वर्षका बेला हुने चहलपहल ठप्प प्राय हुने देखिएको छ । हाल युरोपका पनि अधिकांश देशमा कोरोना संक्रमण फैलँदो क्रममा रहेका कारण युरोप भित्रको पर्यटनधन्दा लगभग ठप्पप्राय बनेको छ ।

बेलायतमा नयाँ खालको कोरोना संक्रमितका कारण भोलिका दिनमा अस्पतालहरु भरिभराउ हुने सम्भावना देखिएको भन्दै विज्ञहरुले विशेष सावधानी अपनाउनका लागि आग्रह गरेका छन् ।