सरकारको निर्णय : भदौ १ बाट राष्ट्रिय र अन्तर्राष्ट्रिय उडान सूचारु हुने

Best Khabar Team | २०२६ पुष १७ गते बिहिबार

२० जुलाई, २०२०
काठमाडौं । अन्ततः सरकारले आगामी भदौ १ बाट राष्ट्रिय तथा अन्तर्राष्ट्रिय उडान सूचारु गर्ने निर्णय गरेको छ । नेपाल सरकार मन्त्रीपरिषद्को आज बसेको बैठकले कोरोना भाइरसको संक्रमणलाई मध्यनजर गर्दै जारी लकडाउनका कारण गत चैत्र पहिलो सातादेखि बन्द रहेको राष्ट्रिय तथा अन्तर्राष्ट्रिय उडान सूचारु गर्ने निर्णय गरेको हो ।

यसअघि बेष्टखबर डटकमलाई पर्यटन मन्त्रालय स्रोतले दिएको जानकारी आधारमा हामीले यो समाचार मन्त्रीपरिषद् बैठकअघि नै संप्रेषण गरेका थियौं । गएको चैत्र ११ बाट आन्तरिक उडान रोकिएको भएपनि चैत्र ६ गतेबाट सबै अन्तर्राष्ट्रिय उडान रोकिएको थियो । सरकारले अहिलेको अवस्थामा कोरोना संक्रमितको संख्या घट्दै गएका कारण आगामी भदौ १ बाट हवाई उडान (आन्तरिक तथा बाह्य) सूचारु गर्ने निर्णय गरेको हो ।

सरकारको यो निर्णयसँगै विदेशमा रोकिएका र विदेश जान नपाएर स्वदेशमै बसेका हजारौं यात्रुलाई प्रत्यक्ष फाइदा पुगेको छ । हाल कोरोनाका कारण भएको लकडाउनका विश्वका विभिन्न देशमा दशौं हजार नेपालीहरु नेपाल फर्कने प्रतिक्षामा छन् । सरकारले लकडाउनका बेला पनि अत्यावश्यक सेवा प्रवाह गर्ने विमानहरुलाई निर्वाध रुपमा सञ्चालन हुन दिएको थियो भने चार्डर उडान पनि भै रहेको थियो ।

यस्तै सरकारले आगामी साउन १५ गतेदेखि नेपालका सबै होटलहरुलाई सञ्चालनको अनुमति पनि दिने निर्णय गरेको छ ।