इजरायलमा जोखिममा रहेका २५४ जना नेपाली चार्टर उडानबाट मध्यरातमा काठमाडौं आइपुगे

Best Khabar Team | २०८० मंशिर २४ गते आइतबार

१२ अक्टोबर, २०२३
काठमाडौं । सरकारले इजरालयमा जारी युद्दको चपेटामा परेका २ सय ५४ जना नेपाली नागरिकहरुलाई काठमाडौं ल्याएको छ । परराष्ट्रमन्त्री एनपी साउदको नेतृत्वमा इजरायल पुगेको सरकारी टोलीले नेपाली ध्वजाबाहक नेपाल बायुसेवा निगमको चार्टर विमानमार्फत् उनीहरुलाई नेपाल ल्याएको हो । गत शनिबार इजरायलमा भएको प्यालेस्टिनी आतंकबादी संगठन हमासको आक्रमणपछि १० जनाको ज्यान गएको थियो ।

***नेपाल फर्किएको*** ***नेपाली टोली विमानभित्र साथमा परराष्ट्रमन्त्री एनपी साउद***

घटनापछि उत्पन्न असहज र असुरक्षित परिस्थितिका कारण नेपाल फर्कन चाहेका नेपालीहरुको तथ्यांक सरकारले त्यहाँस्थित नेपाली दुतावास, गैरआवासीय नेपाली संघ इजरायल र अनलाइनमार्फत संकलन गरेको थियो । विशेष गरी इजरायलको कृषि अध्ययन क्षेत्रमा गएको विद्यार्थीहरु हमासको आक्रमणपछि असुरक्षित बनेका थिए । उनीहरुलाई लिएको नेपाल बायुसेवा निगमको बिमान शुक्रबार बिहान साढे १ बजेतिर त्रिभुवन अन्र्तराष्ट्रिय विमानस्थलमा अवतरण गरेको थियो । विदेश फर्किएकाहरुमा विशेष गरी युद्दग्रस्त क्षेत्रमा रहेका नेपाली विद्यार्थीहरु रहेका छन् । दुर्घटनामा घाइते भएका केही नेपालीको इजरायलको स्थानीय अस्पतालमा उपचार भै रहेको छ । नेपाल फर्कनको लागि लागि मंगलबार अपरान्हसम्म ५ सय ३ जनाको आवेदन परेको भएपनि जोखिममा रहेका र केही घाइतेलाई नेपाल फर्काइएको हो । स्थानीय चिकित्सकको सिफारिसमा ती घाइतेलाई नेपाल फर्काउन अनुमति प्राप्त भएको परराष्ट्र मन्त्रालयले जनाएको छ ।

इजरायल गएको नेपाल बायुसेवा निगमको चार्टर विमानका चालक दलका सदस्य । तस्वीर सौजन्य : परराष्ट्र मन्त्रालय

१७ जना नेपाली विद्यार्थी बसेको एउटा घरमा प्यालेस्टाइनी आतंकबादी समूह हमासले आक्रमण गर्दा १० नेपालीको ज्यान गएको थियो भने विपिन जोशी नाम गरेका एक नेपाली भने अहिलेसम्म वेपत्ता छन् । सो घटनामा ज्यान गुमाएका १० नेपालीको शव ल्याउनका लागि सरकारले इजरायल सरकारसँग समन्वय गरिरहेको जनाएको छ ।