बैद्य नेतृत्वको माओवादीका उपाध्यक्ष गजुरेलसहित करिब एक दर्जन काठमाडौंबाट पक्राउ

Best Khabar Team | २०७६ पुष १३ गते आइतबार

२९ डिसेम्बर, २०१९
काठमाडौं । सिमा विवादसम्बन्धी ज्ञापनपत्र बुझाउने जाने क्रममा प्रहरीले नेपाल कम्युनिष्ट पार्टी क्रान्तिकारी माओवादीका उपाध्यक्ष सीपी गजुरेलसहितका कार्यकर्तालाई सिंहदबारबाट पक्राउ गरेको छ ।

पक्राउ पर्नेमा उपाध्यक्ष गजुरेलसहित सिंहदबार पुगेका नेका माओवादीका करिब एक दर्जन कार्यकर्ता रहेका छन् । उनीहरुले लिपुलेक, लिम्पियाधुरालगायतका क्षेत्र अतिक्रमण गरी भारतले बनाएको नयाँ नक्सा तत्काल सच्चाउन दबाब दिने उद्देश्यले उपप्रधान एवं रक्षामन्त्री ईश्वर पोखरेललाई ज्ञापनपत्र बुझाउने तयारी गर्दै थिए । यस क्रममा गजुरेलसहितका नेता तथा कार्यकर्ताहरु ठूलो भीड लिएर सिंहदबारको दक्षिण ढोका अगाडि पुगेकै बेला प्रहरीले उनीहरुलाई त्यहाँबाट नियन्त्रणमा लिएको बताइएको छ ।

ठूलो भीडसहित सिंहदबार प्रवेश गर्न लागेको बेला प्रहरीले रोक्न खोज्दा दुबैतर्फबाट ठेलमेठेल भएपछि प्रहरीले प्रदर्शनकारीलाई नियन्त्रणमा लिएको थियो । पक्राउ परेकाहरुलाई सिंहदबारस्थित प्रहरी बृत्तमा राखिएको छ । गजुरेल मोहन बैद्य नेतृत्वको नेपाल कम्युनिष्ट पार्टी माओवादीका उपाध्यक्ष हुन् ।