घुसकाण्डमा मुछिएका दोलखाका तत्कालीन सिडियो अख्तियारको नियन्त्रणमा

Best Khabar Team | २०७६ पुष १५ गते मंगलबार

३१ डिसेम्बर, २०१९
काठमाडौं । अख्तियार दुरुपयोग अनुसन्धान आयोगले दोलखाका तत्कालीन प्रमुख जिल्ला अधिकारी (सिडियो) खगेन्द्रप्रसाद रिजाललाई नियन्त्रणमा लिएको छ । दोलखामा सिडियो भएर काम गरेका बेला रिजालले क्षेत्राधिकार मिचेर विभिन्न मुद्दाका अभियुक्तसँग १ लाख भन्दा बढी घुस लिएको भिडियो सार्वजनिक भएपछि उनलाई गृहमन्त्रालयले निलम्बन्ध गरी अनुसन्धान अघि बढाईको थियो ।

स्मरणीय के छ भने रिजाल यसअघि अख्तियार दुरुपयोग अनुसन्धान आयोगमा समेत रहेर काम गरिसकेका व्यक्ति हुन् । उनले मुद्दाका अभियुक्तलाई धरौटीमा रिहा गर्ने भन्दै मेलुङ गाउँपालिकाका कुमार लामा सँग ९० हजा र कालिञ्चोक गाउँपालिकाका उदिम तामाङ र इन्द्रबहादुर तामाङसँग बुधबार २१ हजार रुपैयाँ घुस लिएको अख्तियारको भनाई छ । उनले यति धेरै रकम लिँदा जम्मा १० हजारको मात्रै विल दिएका थिए ।

घुस लिएको भिडियो सार्वजनिक भएपछि रिजाललाई दोलखाबाट काठमाडौं झिकाएर अनुसन्धान अघि बढाईको थियो । नेपाल सरकारका उपसचिव रिजलालाई गत मंसीर २३ गते गृहमन्त्रालय बोलाएर सोधपुछ पछि सामान्य प्रशासन मन्त्रालयमा सरुवा गरिएको थियो । अख्तियारले लामो समयको अनुसन्धान पछि रिजाललाई आज नियन्त्रणमा लिएको हो । हाल रिजाललाई टंगालस्थित अख्तियारको हिसासतमा राखिएको बताइएको छ ।