कोरोनाको विश्वयापी प्रकोप : भारतमा पनि एकको ज्यान गयो, संक्रमितको संख्या ६० पुग्यो

Best Khabar Team | २०७७ मंशिर १८ गते बिहिबार

१२ मार्च, २०२०
नयाँ दिल्ली । भारतमा कोरोना संक्रमित एक जनाको ज्यान गएको छ । भारतको स्वास्थ्य मन्त्रालयले दिएको जानकारी अनुसार विगत एक महिनादेखि अस्पतालमा उपचार गराई रहेका कर्नाटक राज्यका एक संक्रमितको मंगलबारराति निधन भएको हो ।

कर्नाटकको कलबुर्गीका ७६ वर्षीय ती पुरुषको उपचारको क्रममा मंगलबार राति ज्यान गएको भएपनि यसको घोषणा भने बिहीबार साँझ मात्रै गरिएको थियो । मंगलबार निधन भएका व्यक्तिको ल्याब परिक्षणबाट आएको रिपोर्टमा उनमा कोरोनाको भेटिएको पुष्टि भएको बताइएको छ ।

उनी केही समयअघि साउदी अरेवियाबाट भारत फर्केका थिए । उनका सम्पर्कमा रहेका अन्य व्यक्तिहरुको बारेमा पनि प्रहरीले खोजबिन थालेको छ । भारतमा हालसम्म ६० जनामा कोरोना भाइरसको संक्रमण भेटिएको छ । जसमध्ये एकको ज्यान गएको हो ।

भारतले कोरोना भाइरसको संक्रमण बढ्न थालेपछि स्कुल, कलेज तथा सिनेमाहलहरु बन्द गर्ने निर्णय गरेको छ । यसअघि भारतले सबै स्थल नाकाहरु बन्द गर्ने निर्णय गरिसकेको छ ।