सीमा अतिक्रमणको विरोध गर्ने सेनाका पूर्वजर्नेल र प्रहरीका पूर्व एआइजी पत्रकार सम्मेलनबाटै समातिए

Best Khabar Team | २०७७ बैशाख २७ गते शनिबार

०९ मे, २०२०
काठमाडौं । नेपाली भूमी मिचेर भारतले एकलौटी ढंगले तिब्बतको पवित्रस्थल मानसरोबर जाने सडक बनाएको विरोधमा पत्रकार सम्मेलन भै रहँदा काठमाडौंबाट नेपाली सेनाका पूर्व जर्नेल र नेपाल प्रहरीका पूर्व एआइजी पक्राउ परेका छन् । काठमाडौंको धुम्बाराहीस्थित शंकपार्कमा आज साँझ पत्रकार सम्मेलन गरी घटनाको विरोध जनाउन लागेका नेपाली सेनाका पूर्व जर्नेल प्रेमसिंह बस्न्यात र नेपाल प्रहरीका पूर्व एआईजी ठाकुरमोहन श्रेष्ठलाई प्रहरीले नियन्त्रणमा लिएको हो ।

लकडाउन उल्लंघन गरी शंखपार्कमा भेला भएर भारतको विरोध गरेको भन्दै प्रहरीले बस्नेत र श्रेष्ठलाई शंखपार्कबाट समातेको हो । उनीहरुलाई नेकपाको कार्यालय धुम्बाराही अगाडिको शंखपार्कबाट पक्रेर गाडीमा राखेर महाराजगञ्ज प्रहरीमा ल्याएको छ । हाल बस्न्यात र श्रेष्ठ दुबैजना महाराजगञ्ज प्रहरीको नियन्त्रणमा रहेका छन् ।

पक्राउ परेकाहरुले आफूहरुलाई प्रहरीले भारतको विरोध किन गरेको भन्दै समातेको प्रतिक्रिया दिएका छन् । भारतले हिजोदेखि नेपालको कालापानी क्षेत्रमा रहेको दार्चुलाको लिपुलेक क्षेत्र हुँदै तिब्बतको कैलाश मानसरोबर जानका लागि नयाँ बाटो खोलेसँगै यसको विरोध शुरु भएको हो । नेपाललाई जानकारी नै नगरी नेपाली भूमि हुँदै भारतले सिमा मिचेर सो सडक सञ्चालनमा ल्याएको विरोधमा काठमाडौंमा लकडाउनकै बीच पनि प्रदर्शन शुरु भएको छ ।