निजी विद्यालयहरुलाई शिक्षा मन्त्रालयको निर्देशन : विद्यालय बन्द हुँदाको शुल्क नलिनु

Best Khabar Team | २०७७ असार ९ गते मंगलबार

२३ जुन, २०२०
काठमाडौं । निजी विद्यालय सञ्चालकहरुले लकडाउनका बेला बन्द भएका विद्यालयहरुमा अध्ययनरत विद्यार्थीहरुलाई सो समयको समेत शुल्क तिर्न दबाब दिने उद्देश्यले हालै जारी गरेको विज्ञप्तिप्रति शिक्षा मन्त्रालयले गम्भीर ध्यानाकर्षण भएको जनाएको छ ।

लकडाउनका कारण गएको चैत्रको पहिलो सातादेखि विद्यालयहरु बन्द रहेपनि अनलाईन तथा अन्य शिक्षाको नाममा विभिन्न विद्यालयहरुले विद्याथीसँग यसबीचको शुल्क तिर्नका लागि दबाब दिने उद्देश्यले विज्ञप्ति जारी गरेपछि सरकारले विज्ञप्ति निकालेर त्यसो नगर्न निजी विद्यालय सञ्चालकलाई निर्देशन दिएको हो । शिक्षा, विज्ञान तथा प्रविधि मन्त्रालयले अभिभावक तथा विद्यार्थीसँग विद्यालय बन्द हुँदाका बखतको शिक्षा शुल्क लिन नमिल्ने भन्दै सरकारको यो निर्देशनलाई पालन गर्नका लागि विज्ञप्तिमार्फत् अनुरोध गरेको छ ।

**शिक्षा मन्त्रालयले जारी गरेको विज्ञप्ति ।**

२ दिन अघि निजी विद्यालय सञ्चालकहरुको संस्था प्याब्सन र नेशनल प्याब्सनले लकडाउनको समयको पनि शुल्क तिर्न विद्यार्थीहरुलाई आग्रह गरेको थियो । सरकारले तत्काल स्कुल, क्याम्पस खोल्ने विषयमा कुनै निर्णय नभएको भन्दै यथास्थितिमा विद्यार्थीे शुल्कको नाममा अभिभावकलाई लोड नथोपर्न विद्यालय सञ्चालकलाई अनुरोध गरेका छन् ।

निजी विद्यालयहरुले भोग्नुपरेको समस्याको विषयमा उनीहरुसँग बसेर छलफल गर्न सरकार सँधै तयार रहेको भन्दै मन्त्रालयले लकडाउनको शुल्क लिने निर्णय नगर्न व्यवहारिक नभएको जनाएको छ ।