Best Khabar Team | २०७६ माघ २२ गते बुधबार

---

पि.एल. तरंग
– सरकारले नोबल कोरोना भाईरसबाट ग्रस्त बनेको चीनको हुवेई, उहानलगायतका प्रान्तमा रहेका नेपालीहरुको उद्दार गर्ने बताएको करिब १ साता वित्न लागिसकेको छ । परराष्ट्रमन्त्री प्रदिप ज्ञवाली तथा पर्यटनमन्त्री योगेश भट्टराईले सञ्चारमाध्यमसँग पटक–पटक चीनमा रहेका विद्यार्थी तथा अन्य क्षेत्रमा कार्यरत नेपालीको उद्दारका लागि सरकारले कुनै कसर बाँकी नराख्ने बताउँदै आएका छन् ।

सरकारले चीनबाट उद्दार गरेर ल्याउने नेपालीहरुलाई राख्नका लागि केही सम्भावित ठाउँहरुको पनि टुंगो लगाएको थियो । तर काठमाडौंको नार्गाजुन नगरपालिका र भक्तपुरको खरीपाटी क्षेत्रमा चीनबाट उद्दार गरिएका नेपालीहरुलाई राख्ने सहमति सरकारले गरेपछि अहिले स्थानीय वासिन्दा ती क्षेत्रमा चीनबाट ल्याइएको नेपालीहरु प्रवेश गर्न दिने सोचमा छैनन् ।

सरकारले सरोकारवालाहरुसँग छलफल गरेर भक्तपुरको खरीपाटीमा रहेको कृषि तालिम तथा विद्यूत् प्राधिकरणको तालिम केन्द्रमा उनीहरुलाई राख्ने बताएसँगै ती क्षेत्रमा स्थानीयले आज दिनभर सो क्षेत्रमा प्रदर्शन समेत गरेका छन् । यस्तै नागार्जुन नगरपालिकाका स्थानीयले पनि उनीहरुलाई कुनै हालतमा बस्ती नजिक ल्याएर राख्न नहुनेतर्फ सरकारको ध्यानाकर्षण गराईरहेका छन् ।

यहाँ कुरा नागार्जुन वा खरिपाटीको होइन, अन्र्तराष्ट्रियस्तरमा संकटकाल लगाएर सबैलाई खबरदारी गरिएको नोबल कोरोना भाइरसको संक्रमण फैलन नदिन सरकारले अहिलेसम्म कुनै प्रभावकारी उपाय वा अस्पताल चयन गरेको पाईँदैन । त्यसो त उनीहरुलाई केही समय अस्पतालमा राखेर उनीहरुको स्वास्थ्य चेकजाँच गरेपछिमात्रै कुनै केयर सेन्टरमा राख्ने वा उनीहरुलाई घर पठाउने भन्ने निर्णय सरकारले गर्नुपर्ने हो ।

तर अहिलेसम्म सरकारले उनीहरुलाई ल्याएर कहाँ राख्ने भन्ने ठाउँ टुंग्याउन सकेको छैन यो ७ दिनमा । स्मरणीय के छ भने चीनले यहीबीच २४ घण्टा लगाएर एउटा अस्पताल नै निर्माण गरेको छ कोरोना संक्रमणको उपचारको लागि । तर यस्तो अद्भुद् कार्यक्षमता भएको छिमेकी पाउँदासमेत हामीले उनीहरुको काम गर्ने शैलीको एक भागपनि आत्मसाथ गर्नु त परैको कुरा आफ्ना नागरिकहरुलाई सुरक्षा दिन र उनीहरुको उद्दारमा अहिलेसम्म कुनै तदारुकता देखाउन सकिरहेका छैनौं ।

त्यसो त चीनमा धेरै नेपाली उद्दारको पर्खाइमा पनिली मात्र उद्दार छैनन् । परराष्ट्रकै डाटालाई आधार मान्ने हो भने करिब २ सय नेपाली उद्दारको पखाईमा छन् । एक किसिमले नोबल कोरोना भाइरसको इपिसेन्टरमा नाकाबन्दी जस्तै बनिरहँदा त्यहाँ रहेका नेपालीको मनमा के र कस्तो विचार खेलिरहेका होला ? उनीहरुलाई छिटो भन्दा छिटो उद्दार गर्न नसक्दा उनीहरुमा पर्नसक्ने मनोबैज्ञानिक असरलगायतका विषयमा सरकारले अहिलेसम्म केही मुल्यांकन समेत गरेको जस्तो देखिँदैन ।

त्यसैले त त्यहाँ रहेका नेपालीहरुले दिनहुँजसो सरकारसँग हारगुहार गरिरहेका छन् । एक्काईसौं शताब्दीमा प्रविधिले मानिसलाई साँधुरो विश्वमा हिँडाईरहेको सन्दर्भमा अहिले चीनमा रहेका नेपालीहरुलाई त्यहाँबाट उद्दार गर्न कुनै कठिनाई देखिँदैन, सिर्फ सरकारले ईच्छाशक्ति र त्यसका लागि युद्दस्तरमा काम हुनुपर्ने देखिन्छ । आफ्नै ध्वजाबाहक विमान पठाएर एकै पटक सबै नेपालीको उद्दार गर्न सरकारलाई कुनै आइतबार कुर्नुपर्देन ।

तर सरकारले उनीहरुलाई राख्ने ठाउँ नै टुंग्याउन नसकेको बहानामा उनीहरुलाई त्यहि बस्न बाध्य बनाउने हो भने यो सरकारप्रति आम नागरिकको साथ र समर्थन थप खस्कने निश्चित छ । त्यसैले तत्काल कुनै ठाउँ विषेश टुंगो लगाएर चीनबाट नेपाली ल्याएपछि उनीहरुलाई सो स्थानमा लागेर राख्ने र त्यसपछि मात्रै यसको बारेमा सार्वजनिक गर्न सके यो विवाद रहित देखिन्छ ।

किनभने चीनमा रहेका नेपालीहरु कसैलाई पनि हालसम्म नोबल कोरोना भाइरसको संक्रमण नरहेको नेपालस्थित चिनियाँ दुतावासले स्पष्ट पारिसकेको छ । त्यसैले यो निर्णयमा सरकारले चतु¥याईँ अपनाउनुपर्ने देखिन्छ । अन्यथा विरोधको नाममा विरोध उनीहरुलाई जहाँ लगेर राखेपनि त्यस क्षेत्रमा रहेका स्थानीयले गर्नेनै छन् ।

---

Comment from facebook