बाजुरामा दुई वर्षकी बालिकाको कोरोना संक्रमणका कारण मृत्यु : मृतकको संख्या ८ पुग्यो

Best Khabar Team | २०७७ जेठ १८ गते आइतबार

३१ मे, २०२०
मार्तडी । सुदुरपश्चिमको बाजुरा जिल्लामा दुई वर्षकी बालिकाको कोरोना संक्रमणको कारण ज्यान गएको छ । सुदरपश्चिमस्थित सामाजिक विकास मन्त्रालयले दिएको जानकारी अनुसार जिल्ला अस्पताल बाजुराको आइसोलेसनमा उपचारमा रहेकी ती बालिकाको आज बिहान अस्पतालमै निधन भएको हो ।

जिल्लास्थित स्वास्थ्य निर्देशकलेपनि घटनाको पुष्टि गरेका छन् । केहीदिनअघि स्वास्थ्यमा समस्या देखिएपनि उनलाई जिल्ला अस्पतालको आइसोलेसनमा राखेर उपचार गरिएको थियो । तर उपचारकै क्रममा आज बिहान उनको ज्यान गएको हो ।

४ दिन अघि उनको स्वाब परीक्षणका लागि धनगढीमा पठाइएको रिपोर्ट पोजेटिभ आएको । यो रिपोर्टसँगै उनको कोरोना संक्रमणकै कारण ज्यान गएको पुष्टि भएको सामाजिक विकास मन्त्रालयले जनाएको छ । यद्यपि स्वास्थ्य मन्त्रालयले भने घटनाको पुष्टि गरिसकेको छैन ।

बालिकासँगै उनकी आमा र बाबुको पनि स्वाब परीक्षणको रिपोर्ट आएको छ । उनकी आमामा कोरोना संक्रमण भेटिएको छ भने बाबुको रिपोर्ट नेगेटिभ आएको छ । यो सँगै नेपालमा कोरोनाका कारण ज्यान गुमाउनेको संख्या ८ पुगेको छ ।