स्पेन सरकारको घोषणा : पोर्चुगल बाहेक अन्य ईयु राष्ट्रसँगको सिमाना जुन २२ देखि खुल्ने

Best Khabar Team | २०२६ पुष १७ गते बिहिबार

१४ जुन, २०२०
सेभिल्ला, स्पेन । कोरोना भाइरस (कोडिभ–१९) को संक्रमणलाई मध्यनजर गर्दै स्पेनले युरोपेली युनियनसम्बद्ध विभिन्न देशसँग लगाएको सिमा नाका बन्दको घोषणामा पुर्नविचार गरेको छ । स्पेनले छिमेकी पोर्चुगलबाहेक अन्य सबै युरोपेली राष्ट्रसँग झण्डै ४ महिनादेखि बन्द रहेको सिमा नाका यही जुन २२ देखि खुल्ला गर्ने निर्णय गरेको छ ।

स्पेनका प्रधानमन्त्री पेद्रो सान्चेज आज एक भिडियो सम्बोधनका क्रममा यस्तो बताएका हुन् । पछिल्ला दिनमा कोरोना संक्रमित तथा मृतकको संख्या ह्वात्तै घटेका कारण सिमा नाका बन्द गर्ने यसअघिको निर्णयमा पुर्नविचार गरिएको प्रधानमन्त्री पेद्रोको भनाई छ । स्पेनले यसअघि आगामी जुन अन्तिमसम्मको लागि युरोपेली युनियनसम्बद्ध राष्ट्रहरुसँगको सिमानाका बन्द गर्ने घोषणा गरेको थियो । तर अहिले स्पेनमा कोरोना संक्रमितको संख्या घट्दै गएपछि जनजीवन तथा आर्थिक गतिविधिलाई सहज बनाउने उपायस्वरुप यो कदम चालिएको उनको भनाई छ । विस्तारै लकडाउनलाई खुकुलो बनाउँदै आर्थिक गतिविधिहरुलाई चलायमान बनाउने योजना स्पेन सरकारको भएको र अहिलेको गमी मौसम (समर)लाई मध्यनजर गर्दै यो घोषणा गरिएको प्रधानमन्त्रीको भनाई छ । स्पेनले छिमेकी मुलुक पोर्चुगलसँगको सिमा नाका भने आगामी जुलाई १ देखि मात्रै खुल्ले स्पष्ट पारेको छ ।

स्पेनमा यो समाचार तयार पार्दासम्म २ लाख ९० हजार ६ सय ८५ जनामा कोरोना संक्रमण देखिएको छ भने २७ हजार १ सय ३६ जनाको कोरोनाका कारण ज्यान गएको छ । पछिल्लो ४ दिनयता स्पेनमा कोरोनाका कारण एकजनाको पनि ज्यान गएको छैन । पोर्चुगलमा पछिल्ला दिनमा कोरोना संक्रमितको संख्या निरन्तर देखिँदै गएको छ । जसका कारण थप एक साता स्पेनले पोर्चुगलसँगको सिमा नाकामा कडाई गर्न लागेको हो । युरोपेली युनियनले यही जुन १ देखि ईयुसम्बद्ध सबै देशमा लकडाउन र आन्तरिक सिमा नाकामा लगाईको प्रतिबन्ध हटाउन भनेको थियो । ईयुको यो निर्देशनसँगै युरोपका अधिकांश देशले लकडाउन र देशभित्र जारी आपत्काललाई हटाएर जनजीवन सामान्य बनाएका छन् ।

कतिपय देशले गर्मी महिनामा आउने पर्यटकलाई मध्यनजर गर्दै व्यवसायहरुसमेत सञ्चालनमा ल्याएका छन् । स्लोभेनिया, डेनमार्क, नर्वे, पोर्चुगल, क्रोयसिया, पोल्याडलगायतका देशले आन्तरिक जनजीवन सामान्य बनाउन थालेका छन् । यद्यपि विश्व स्वास्थ्य संगठनले दिएको माक्स र सामाजिक दुरीको मापदण्डलाई भने लकडाउन खुल्ला भएपछिपनि पालना गर्न अनिवार्य गरिएको छ । युरोपेली युनियनसम्बद्ध अधिकांश देशमा गएको मार्चको पहिलो सातादेखि लकडाउन र आन्तरिक संकटकाल लागू गरिएको थियो । युरोपमा अहिले गर्मी मौसम शुरुभएकोले पर्यटकीय गतिविधि सञ्चालन भै करोडौैंको आर्थिक गतिविधि हुने समय भएकोले पनि लकडाउनलाई विस्तारै खुकुलो बनाउँदै जनजीवन सामान्य बनाउन लागिएको हो ।

अहिले युरोपका धेरैजसो देशमा किनमेल गर्ने बजार, रेस्टुरेन्ट, होटललगायतका पर्यटक केन्द्रीय गतिविधि सञ्चालन भएपनि कतिपय स्कुल, क्याम्पस सञ्चालनका लागि अधिकांश देशले अनुमति दिएका छैनन् । डेनमार्क, फिनल्याण्डलगायतका केही देशले भने निश्चित मापदण्ड बनाएर सानो संख्यामा बालबालिकालाई पढाईरहेका छन् । युरोपको स्लोभानियाले यसअघि नै आफ्नो देशलाई कोरोना मुक्त देशको रुपमा घोषणा गरिसकेको छ ।