लिबिया आक्रमणमा लमजुङ्गे युवकसहित ४४ मारिए

Best Khabar Team | २०७६ असार १९ गते बिहिबार

०४ जुलाई, २०१९
बेसीसहर । द्वन्द्वग्रस्त अफ्रिकीमुलुक लिवियामा बुधबारको हवाई आक्रमणमा एक नेपाली युवकसहित ४४ जनाको ज्यान गएको छ । विगत लामो समयदेखि लिवियामा आतंक मच्चाईरहेको विद्रोही समूह द लिबियन नेशनल आर्मीले त्रिपोलीको डिटेन्सन सेन्टरमा गरेको आक्रमणमा लमजुङ्ग स्थायी घर भएका सन्तोष श्रेष्ठको ज्यान गएको हो ।

सो आक्रमणमा परी १ सय ५० घाइते भएको अन्र्तराष्ट्रिय सञ्चारमाध्यमहरुले जनाएका छन् । विद्रोही समूहले आप्रवासीहरु रहेको ताजोउरास्थित सेन्टरमा हवाई आक्रमण गरेका थिए । मृतक सन्तोष केही समयअघि युरोप यात्राका लागि भन्दै दलालको चंगुलमा परेर लिबिया पुगेका थिए । युरोप जाने क्रममा सन्तोषले करिब १५ लाख रुपैयाँ बुझाईसकेका थिए भने उनको युरोपको सपना लिबियामा पुगेर समाप्त भएको छ ।

अबैध रुपमा युरोप छिर्न खोज्ने सयौंलाई लिबियाको स्थानीय सरकारले थुनेर डिटेन्सन सेन्टरमा राख्ने गरेको छ । सोही सेन्टरमा आक्रमण गर्दा सन्तोष सहित कम्तीमा ४४ को ज्यान गएको र सयौं घाइते भएका हुन् । पछिल्ला वर्षहरुमा लिबियामा हिंसा भड्कँदै गएपछि त्यहाँ रहेका विदेशी नागरिकहरुलाई सम्बन्धित देशले लिबिया छाड्न यसअघि नै निर्देशन दिँदै आएका थिए ।