मदन पुरस्कार ओझा र जगदम्बाश्री पुरस्कार मुखियालाई प्रदान

Best Khabar Team | २०८० आश्विन २९ गते सोमबार

१६ अक्टोबर, २०२३
काठमाडौं । यसवर्षको मदन पुरस्कार र जगदम्बाश्री पुरस्कार क्रमश उपन्यासकार विशेक ओझा र कलाकार टेकवीर मुखियालाई प्रदान गरिएको छ । ललितपुरमा आज गरिएको एक कार्यक्रममा मदन पुरस्कार गुठीका अध्यक्ष कुन्द दिक्षीतले ओझा र मुखिलालाई पुरस्कार प्रदान गरेका हुन् । पुरस्कारको राशी जनही चार लाख रुपैयाँ रहेको छ । मदन पुरस्कार गुठीले हरेक वर्ष प्रकाशित पुस्तकहरुमध्येबाट छनौट गरेर उत्कृष्ट कृतिलाई मदन पुरस्कार प्रदान गर्दै आइरहेको छ ।

यही क्रममा ओझाले लेखेको पुस्तक ‘ऐंठन’ले यो वर्षको मदन पुरस्कारको उपाधी प्राप्त गरेको हो । उपन्यासकार ओझाले माओवादीले विगतमा गरेको सशस्त्र युद्दको विषयहरुलाई यो पुस्तकमा समावेश गरेका छन् । विगतमा नेपाल राष्ट्र एवम् नेपाली समाजले बेहोरेको द्वन्द्वको दुःस्वप्न लेखनको प्रविधि पनि मिसाई उत्कृष्ट औपन्यासिक कलाको उपयोग गरेको भन्दै सो कृतिलाई पुरस्कृत गर्ने निर्णय गुठीले गरेको थियो । मदन पुरस्कार विक्रम संवत २०१२ सालमा स्थापना भएको हो । पहिलो पटक यो पुरस्कार २०१३ सालमा स्वर्गीय सत्यमोहन जोशी र बलराम जोशीलाई संयुक्त रुपमा प्रदान गरिएको थियो ।

यस्तै यो वर्षको जगदम्बा श्री पुरस्कार पाएका टेकवीर मुखियाले भने नेपाली वाङ्गमयको क्षेत्रमा सक्रिय छन् । उनी चित्रकलामा नेपालका चर्चित कलाकारको रुपमा चिनिन्छन् । मुखियाले यसअघि गोरखा दक्षिणबाहु, राष्ट्रिय प्रतिभा पुरस्कार लगायत दर्जनौं पुरस्कार पाइसकेका छन् ।

Comment from facebook