सिन्धुपाल्चोकमा निर्माणाधिन कभर्ड हल पहिरोले बगाउँदा ८ मजदुरको मृत्यु

Best Khabar Team | २०७७ श्रावण १९ गते सोमबार

०३ अगस्ट, २०२०
बाह्रबिसे । सिन्धुपाल्चोकमा नवनिर्मित कभर्ड हल पहिरोले बगाउँदा ८ जनाको घटनास्थलमै ज्यान गएको छ । जिल्ला प्रहरी कार्यालय सिन्धुपाल्चोकले दिएको जानकारी अनुसार आज बिहान ३ बजेतिर स्थानीय मेलम्ची नगरपालिकाको गैह्रीबजारमा माथिबाट आएको पहिरोले बन्दै गरेको कर्भड हल बगाएको थियो । मृतकहरु सबै सो कर्भडहल बनाउने काममा खटिएका मजदुरहरु रहेको स्थानीयको भनाई छ ।

**तस्वीर साभार : पत्रकार विष्णु क्षेत्रीको फेसबुक ।**

सिन्धुपाल्चोक जिल्लाको मेलम्ची नगरपालिका वडा नम्बर ११ गैह्रीबजारमा निर्माण भै रहेको सो कभर्ड हल माथिबाट पहिरो आएपछि भास्सिएर बगेको थियो । मृतकहरु मध्ये ५ जना बारा, २ जना पर्सा र एकजना भारतिय नागरिक रहेको बताइएको छ । काम सकेर राति सोही कर्भड हल छेउमा रहेको क्वार्टरमा सुतेका उनीहरुलाई आज बिहान ३ बजेतिर एक्कासी आएको पहिरोले कभर्ड हलसहित बगाएको थियो । बगाएर वेपत्ता भएकाहरुको शव प्रहरी र स्थानीय वासिन्दाको सहयोगमा केहीबेरअघि निकालिएको थियो ।

मृतक सबैको सनाखत समेत भै सकेको छ । सो घटनामा घाइते भएका एकजना भारतीय मजदुरलाई उपचारका लागि काठमाडौं पठाईको छ । पहिरोले कर्भडहलको आधा भाग भास्सिएको बताइएको छ । वेपत्ताभएकाहरुको खोजीका लागि इप्रका मेलम्चीमा रहेको प्रहरीको टोली र स्थानीय वासिन्दा बिहानैदेखि खटिएका थिए । घाइतेलाई हेलिकोप्टरमा राखेर काठमाडौं पठाईएको मेलम्ची नगरपालिकाले जनाएको छ । अहिले घटनास्थलमा प्रहरीले त्यस क्षेत्रमा हुनसक्ने अन्य सम्भावित जोखिम तथा क्षतिको बारेमा अनुसन्धान गरिरहेको छ ।