कोरोनाका बिरामीलाई अबदेखि सरकारी अस्पतालमा मात्रै उपचार गरिने : पिसिआर शुल्क घट्यो

Best Khabar Team | २०७८ आश्विन १६ गते शनिबार

१० फेब्रुअरी, २०२१
काठमाडौं । सरकारले कोभिड १९ को संक्रमण देखिएका विरामीहरुलाई अबदेखि सरकारी अस्पतालमा मात्रै उपचार गर्ने गरी नियम परिवर्तन गरेको छ । स्वास्थ्य तथा जनसंख्या मन्त्रालयका अनुसार यसअघि निजी अस्पताल तथा मेडिकल कलेजहमा समेत कोरोनाका विरामीहरुको उपचार गरिँदै आएकोमा अबदेखि यस्ता विरामीहरुलाई सरकारी अस्पतालमात्रै उपचार गर्ने गरी नियम परिवर्तन गरेको हो ।

पछिल्ला दिनहरुमा देशव्यापी रुपमा कोरोना संक्रमितको संख्या घटेसँगै सरकारी अस्पतालले नै नयाँ संक्रमितको परीक्षण तथा उपचार गर्न सकिने भन्दै सरकारले यस्तो व्यवस्था गरेको हो । यस्तै सरकारले निजी अस्पतालमा उपचार गराईरहेका कोरोना संक्रमितहरुको अब थप १० दिनको खर्चमात्रै भर्ने भन्दै १० दिनपछि निजी अस्पतालमा उपचारमा संलग्न विरामीको उपचार खर्च (सोधभर्ना) सरकारले व्यहोर्न नसक्ने जनाएको छ ।

स्वास्थ्य मन्त्रालय अन्तरर्गतको ‘इन्सिडेन्ट कमाण्ड सिस्टम’ को आज बसेको बैठकले भोलिबाट भेटिने नयाँ कोरोना संक्रमितहरुलाई सरकारी अस्पतालमै उपचार गर्ने व्यवस्थासहित सम्बन्धित विभिन्न निजी अस्पताल तथा मेडिकल कजेजहरुलाई जानकारी गराउने जनाएको छ । यस्तै सरकारले सरकारी प्रयोगशालामा कोरोना परिक्षणका लागि स्वाब संकलन (पिसिआर) जाँज गरेको शुल्क १ हजार मात्रै लाग्ने भएको छ ।

स्वास्थ्य मन्त्रालयले जनाए अनुसार अबदेखि सरकारी क्लिनिकहरुमा कोभिड १९ को परीक्षण गर्दा शुल्क बापत १ हजार रुपैयाँमात्रै तिर्ने गरी शुल्क समायोजना गरिएको हो । सरकारले यसअघि सरकारी क्लिकिनहरुमा पिसिआर टेस्ट गरेको शुल्क २ हजार रुपैयाँ लिने व्यवस्था गरेको थियो । कोरोना संक्रमित घट्दै गएका तथा कोरोना परिक्षणलाई थप सहज बनाउनका लागि यो व्यवस्था गराइएको स्वाथ्य मन्त्रालयका प्रवक्ता डा. जागेश्वर गौतमले जानकारी दिएका छन् ।