कोरोना कहरकैबीच भारतले २ महिनापछि यसरी खोल्यो आन्तरिक उडान (भिडियोसहित)

Best Khabar Team | २०७७ जेठ १२ गते सोमबार

२५ मे, २०२०
नयाँदिल्ली । कोरोनाको संक्रमणका कारण विगत २ महिनादेखि बन्द रहेको भारतको आन्तरिक उडान आज बिहानदेखि सूचारु भएको छ । विमानमार्फत यात्रुहरु एक ठाउँदेखि अर्को ठाउँमा पुग्दा सहजै कोरोना भाइरसपनि फैलिएको विश्वव्यापी तथ्यलाई आत्मसाथ गर्दै भारतले गएको मार्च अन्तिम साता (२५ तारिख) देखि आन्तरिकलगायतका उडानसेवा बन्द गरेको थियो ।

कोरोनाका नयाँ संक्रमित तथा ज्यान गुमाउनेहरुको संख्या थपिँदै गर्दा भारतले विगत २ महिनादेखि जारी विमान उडानमाथिको प्रतिबन्धलाई हटाउँदै आजदेखि २ प्रदेशबाहेक अन्यमा हुने आन्तरिक उडान सूचारु गरेको हो । भारतीय सञ्चारमाध्यमहरुका अनुसार भारत सरकारले तोकेको आवश्यक सबै स्वास्थ्य सर्तकता अपनाएर उडान सेवा सुरु गरिएको छ । यद्यपी भारतका पश्चिम बंगाल र आन्ध्र प्रदेशमा भने तत्काल उडान गर्न नसकिने भारतको भनाई छ । विमानमा तत्कालका लगि कोरोना संक्रमण रोक्नका लागि यात्रु, विमान कम्पनी र चालकसहित क्याबिनसदस्यका लागि फरक फरक मापदण्ड तोकिएको छ ।

यात्रुहरुका लागि विमानमा खाजा, खानालगायत दिन बन्द गरिएको छ । यस्तै उनीहरुले अनिवार्य रुपमा माक्स लगाउनुपर्ने व्यवस्था गरिएको छ । यात्रुहरुलाई आन्तरिक उडानमा पनि कम्तीमा दुई घण्टा अगाडी नै विमानस्थलमा आउनुपर्ने व्यवस्था लागू गरिएको छ । यस्तै विमानमा पर्याप्त मात्रामा ह्याण्ड सेनिटाइजरको व्यवस्था गरिएको छ भने सौचालय र अन्य सार्वजनिक स्थानमा भाइरस नियन्त्रणमा विशेष ध्यान दिइएको भारतीय सञ्चारमाध्यमहरुले जनाएका छन् ।

विमानमा रहेका सबै यात्रुहरुलाई विमानमा जानुअघि अनिवार्य रुपमा स्क्रिनिङ गरिने तथा विमानका परिचारिकाहरुले फ्लाइटमा पीपीई किट लगाउनुपर्ने व्यवस्था समेत गरिएको छ । यस्तै एकयात्रुदेखि अर्को यात्रुसम्मको दुरी कम्तीमा दुई मिटरको कायम गरिएको छ । यस्तै विमानको टिकट तथा बोर्डिङ्गका लागि मेसिनको व्यवस्था गरिएको छ भने लगेज तथा व्यागेजलाई स्यानिटाइज गरिने व्यवस्था मिलाइएको छ ।

लामो समयदेखि विमानसेवाहरु बन्द हुँदा र देशमा जारी लकडाउनले अर्थव्यवस्था ध्वस्त हुन लागेको ठहरसहित भारतल सरकारले आवश्यक सावधानीका साथ विमान सेवा सूचारु गरेको हो । विमान शुरुभएको पहिलो दिनको पहिलो उडान आज दिल्लीको इन्दिरा गान्धी इन्टरनेशनल एयरपोर्टबाट बिहान पौने ५ बजे पुनेका लािग छुटको थियो । भारतमा सोमबार साँझसम्म ४ हजार १ सय १७ जनाले ज्यान गुमाएका छन् भने १ लाख ४४ हजार एक सय १८ जनामा संक्रमण देखिएको छ ।