महान पर्व बडादशैं शुरु, आज घटस्थापना

Best Khabar Team | २०२६ पुष १७ गते बिहिबार

१५ अक्टोबर, २०२३
काठमाडौं । नेपालीहरुको महानपर्व दशैं आजबाट विधिबत्रुपमा शुरु भएको छ । आज बिहान नेपाली समय अनुसार ११ बजेर २९ मिनेटको शुभ साइतमा जमरा राखेसँगै आजबाट दशैं शुरुभएको हो । हरेक वर्षको असोज शुक्ल प्रतिपदादेखि कोजाग्रत पूर्णिमासमम्म १५ दिनसम्म धुमधामका लागि मनाइने दशैं पर्वमा विशेष गरी शक्तिस्वरुपा नव दुर्गाभवानीको पूजा आरधना गरि मनाइने गरिन्छ । आज घर घरमा तथा विभिन्न शक्तिपीठको दशैं घरमा दियो, कलश र गणेशको पूजासहित विधिपूर्वक जमरा राख्ने गरिन्छ ।

पवित्र स्थानको माटो, बालुवा पूजा कोठा वा दसैं घरमा ल्याएर मकै, धान, गहुँ, तिललगायत अन्न छरेर जमरा राख्ने गरिन्छ । आज राखिएको जमरा दशैंको टिकाको दिन मान्यजनको हातबाट टीकासहित ग्रहण गर्ने परम्परा रहिआएको छ । दुर्गामातालाई जमरा मन पर्ने भएका कारण विजयादशमीमा प्रसादका रुपमा जमरा ग्रहण गर्ने गरिएको धार्मिक मान्यता रहिआएको छ । विशेष गरी जमरालाई देवीमाताको अंगका रुपमा पनि मान्ने गरिन्छ ।

दसैंमा टीका लगाइसकेपछि फूलको सट्टा समृद्ध र विजयको प्रतिक जमरा लगाउने गरिन्छ । आज घटस्थापना गरिएसँगै शुरुभएको दशैंपर्व विजयादशमीको दिन सम्पन्न हुने छ । त्यसो त कोजाग्रत पूर्णिमासम्म मान्यजनहरुबाट टीका प्रसाद लिन मिल्ने चलन समेत रहेको छ । आज चित्रा नक्षत्र र वैधृति योग परेकाले चित्रा नक्षत्र र वैधृति योगको शान्ति पूजा गरेपछि मात्रै घटस्थापना गर्नु शास्त्रसम्मत देखिने नेपाल पञ्चाङ्ग निर्णयक समितले जनाएको छ ।

यो वर्ष कात्तिक ७ गते दुर्गा विसर्जनको साइत बिहान १० बजेर ३७ मिनेटमा रहेको तथा टीका प्रसाद ग्रहणका लागि बिहान ११ बजेर २ मिनेटको साइत उत्तम समितिले जनाएको छ ।