अमेरिका र युरोपका दुई छुट्टाछुट्टै घटनामा परी दुई नेपाली युवतीको मृत्यु

Best Khabar Team | २०७७ श्रावण १२ गते सोमबार

२७ जुलाई, २०२०
न्यूर्योक, अमेरिका । अमेरिका र युरोपमा भएका दुई छुट्टाछुट्टै घटनामा परी अध्ययनका लागि आएका दुई नेपाली युवतीको ज्यान गएको छ । अमेरिकाको टेक्सासमा रहेको ‘लेक लेविसभिल’ नामक तालमा डुबेर हराई रहेकी नेपाली युवती अस्मीता खानालका शव फेला परेको छ । लाईफज्याकेट बिना डुंगामा चढेर तालमा घुमिरहेका बेला एक्कासी डुंगाबाट खसेर उनी तालमा हराएको बताइएको छ ।

**अमेरिकाको टेक्सासमा तालमा डूबेर निधन भएकी अस्मिता खनाल**

आइतबार मध्यान्ह सो घटना भएपनि अमेरिकाको समय अनुसार सोही दिन साँझ अबेर उनको शव भेटिएको थियो । उनको शवलाई अहिले टेक्सासको एउटा अस्पतालको शव गृहमा राखिएको छ । उनको नेपाल घर कहाँ थियो भन्ने विषयमा अहिलेसम्म केही खुलेको छैन । उनी २३ वर्षकी थिइन् । काठमाडौंको नयाँबजारमा उनको परिवारसँग बस्ने बताइएपनि उनको नेपालको पुरानो घर खुल्न सकेको छैन ।

यस्तै बेस्टखबर डटकमका युरोप सहकर्मीका अनुसार युरोपेली मुलुक साईप्रसमा मोटरसाइकल दुर्घटनामा परी धादिङ्गकी एक युवतीको ज्यान गएको छ । धादिङ्ग धार्के घर भएकी २१ वर्षकी रेणुका कोराइराला साइप्रसको निकोसिया भन्ने स्थानमा मोटरसाइकल दुर्घटनामा परी दिबंगत भएकी हुन् । काम सकेर घर फर्कने क्रममा उनी सवार मोटरसाइकल दुर्घटनामा परेको थियो ।

**साइप्रसमा मोटरसाइकल दुर्घटनामा ज्यान गुमाएकी रेणुका कोइराला**

उनी काम गर्ने स्थानमै काम गर्ने अर्का एकजना सहयोगीले उनलाई मोटरसाइकलमा राखेर कोठा तर्फ पु-याउन जाँदै गर्दा मोटरसाइकल दुर्घटनामा परेको बताइएको छ । दुर्घटनामा मोटरसाइकल चालक भने घाइते मात्र भएका छन् । दुर्घटनालगत्तै प्रहरीले चालक र मोटरसाइकललाई नियन्त्रणमा लिएर अनुसन्धान अघि बढाएको छ । कोइराला गएको पुस महिनामा नेपालबाट अध्ययनका लागि साइप्रस आएकी थिइन् ।

घटना जुलाई २६ गते राति २ बजेतिरको भएको बताइएको छ । उनलाई दुर्घटनालगत्तै घाइते अवस्थामा अस्पताल पु¥याएको भएपनि त्यसको केहीसमयपछि नै चिकित्सकहरुले उनलाई मृत घोषित गरेका थिए ।