म्यानमारमा सैन्य दमन हिंसात्मक बन्दै : ज्यान जोगाउन हजारौं जनता थाइल्याण्डतर्फ भागे

Best Khabar Team | २०७७ चैत्र १६ गते सोमबार

२९ मार्च, २०२१
बैंकक, थाइल्याण्ड । म्यानमारमा गएको फेब्रुअरी १ मा भएको भएको ‘सैन्य कु’ र पछिल्ला दिनमा सेनाले आम नागरिक गरेको बर्बर दमनबाट जोखिन यतिबेला म्यानमारी जनता छिमेकी मुलुक थाइल्याण्डतर्फ भागेका छन् । म्यानमारमा हालै सेनाले निर्वाचित सरकारले चुनावमा धाँधली गर्दै परिणाम आफ्नो पक्षमा पारेको भन्दै शासनसत्ता कब्जा गरेपछि अहिले दैनिक लाखौंले प्रदर्शन गर्दै आइरहेका छन् । सेनाले अहिले आम नागरिकहरुमाथि बर्बर दमन गरिरहेको अन्र्तराष्ट्रिय सञ्चारमाध्यमहरुले जनाएका छन् ।

प्रदर्शनमा उत्रिएका प्रदर्शनकारीमाथि सेनाले गोलीसमेत चलाएको छ । जसका कारण आन्दोलन शुरुभएयता सयौं म्यानमारी जनताले ज्यान गुमाईसकेका छन् भने हजारौं घाइते भएका छन् । प्रदर्शन दबाउन म्यानमारी सेनाले अहिले हवाईमार्गबाट समेत प्रदर्शनकारीहरुमाथि आक्रमण गर्न थालेको छ । सेनाले अहिले प्रदर्शनकारीलाई लक्षित गरी हेलिकोप्टरबाट समेत गाउँलेहरुमाथि आक्रमण गर्न थालेको र सेनाको आक्रमण हिंसात्मक बन्न थालेपछि विशेष गरी अहिले करेन समुदायका नागरिकहरु आफ्नो ज्यान जोगाउन थाइल्याण्डको उत्तरपश्चिमी सिमानामा पुगेको अन्र्तराष्ट्रिय सञ्चारमाध्यमले उल्लेख गरेका छन् ।

स्मरणीय के छ भने म्यानमारमा करेन समुदायकाहरु मानिसहरु विगत लामो समयदेखि आफ्नो समुदायको मुक्तिका लागि आन्दोलनरत छन् । उनीहरुले जारी आन्दोलनमा समर्थन जनाउँदै जातीय मुक्तिको मुद्दालाई सशक्त बनाईरहेका छन् । हालैको प्रदर्शनमा उनीहरुले पनि सक्रिय सैन्य कूको विरुद्ध प्रदर्शनमा सहभागीता जनाउँदै आएका छन् । सैन्य कुसँगै कतिपय म्यानमारी नेताहरुलाई सेनाले आफ्नो नियन्त्रणमा राखेको छ । जुन घटनाको अन्र्तराष्ट्रिय समुदायले विरोध गरेका छन् ।