२४ घण्टामा कोरोनाका ८३८ नयाँ संक्रमित थपिए : थप ११ को मृत्यु

Best Khabar Team | २०२६ पुष १७ गते बिहिबार

२१ अगस्ट, २०२०
काठमाडौं । पछिल्लो २४ घण्टामा देशका विभिन्न जिल्लामा ८ सय ३८ जना कोरोना संक्रमित थपिएका छन् । स्वास्थ्य एवं जनसंख्या मन्त्रालयको नियमित अद्यावधिक तथ्यांक अनुसार आज शुक्रबार अपरान्ह साढे ४ बजेसम्म देशका विभिन्न जिल्लामा ८ सय ३८ जना नयाँ कोरोना संक्रमित थपिएका हुन् ।

योसँगै अब देशभर कोरोना संक्रमितको संख्या ३० हजार नाघेको छ । आज थपिएकामा २ सय ९२ जना महिला र ५ सय ३२ जना पुरुष रहेका छन् । काठमाडौं उपत्यकामा २४ घण्टामा कोरोनाका १ सय ८२ जना नयाँ संक्रमित थपिएका छन् । जसमध्ये काठमाडौमा १ सय ४२ जना, ललितपुरमा २५ र भक्तपुरमा थप १५ जनामा कोरोना संक्रमण देखिएको छ । यस्तै पछिल्लो २४ घण्टामा देशभरबाट २ सय ३० जना कोरोना संक्रमण मुक्त भएका छन् ।

हालसम्म कोरोना संक्रमण भै निको हुनेहरुको संख्या १८ हजार नाघेको मन्त्रालयले जनाएको छ । यसैबीच पछिल्लो २४ घण्टामा देशभर कोरोनाका कारण थप ११ जनाको ज्यान गएको छ । पछिल्लो २४ घण्टामा दोलखा, मकवानपुर, प्युठान, मोरङ, पर्सा, बारा, चितवन, ललितपुरमा एक एक जनाको ज्यान गएको छ । यस्तै काठमाडौंमा २ जनाको ज्यान गएको मन्त्रालयको भनाई छ । हालसम्म कोरोनाका कारण देशभर १ सय ३७ जनाको ज्यान गएको छ ।