बीरगञ्जमा भेटिएका ५३ जना संक्रमितमध्ये सेना, स्वास्थ्यकर्मी र उनीहरुको परिवार पनि

Best Khabar Team | २०७७ श्रावण १५ गते बिहिबार

३० जुलाई, २०२०
ठोरी, पर्सा । पछिल्ला दिनहरुमा बीरगञ्जमा कोरोना भाइरसको संक्रमणले स्वास्थ्यकर्मी र उनीहरुको परिवारका सदस्यहरुपनि प्रभावित बन्न थालेका छन् । पछिल्लो २४ घण्टामा बीरगञ्जमा भेटिएका ५३ जना कोरोा संक्रमितमध्ये ४ जना डाक्टर र स्वास्थ्यकर्मी तथा अन्य ११ जना चिकित्सकका परिवारका सदस्य रहेका छन् ।

बीरगञ्जस्थित नारायणी अस्पतालको क्वार्टरमा बस्दै आएका ११ जना स्वास्थ्यकर्मीका परिवारका सदस्यमा कोरोना संक्रमण देखिएसँगै कोरोनाले चिकित्सक र स्वास्थ्यकर्मीहरुमा संक्रमण फैलँदै गएको पुष्टि भएको छ । बीरगञ्जको नारायणी अस्पताल तथा आसपासका अन्य केही निजी अस्पताल र क्लिनिकमा काम गर्ने उनीहरुमा हालै गरिएको स्वाब परीक्षणको क्रममा कोरोना भाइरस संक्रमण पुष्टि भएको हो ।

वीरगञ्जमा थपिएका ५३ मध्ये २ जना नेपाली सेनाका जवानहरु समेत रहेको र उनीहरु वीरगञ्जमा रहेको सेनाको ब्यारेकमा कार्यरत रहेको बताइएको छ । संक्रमितको संख्या बढ्दै गएपछि बीरगञ्ज र आसपास क्षेत्रका स्थानीय वासिन्दाले फेरि लकडाउन गर्न माग गरेका छन् ।