मंगलबार अमेरिकामा कोरोनाका कारण १४ सयको मृत्यु, न्यूर्योकमा मात्रै ७ सय बढीको ज्यान गयो

Best Khabar Team | २०७६ चैत्र २५ गते मंगलबार

०७ अप्रिल, २०२०
न्यूर्योक । अमेरिकामा पछिल्ला दिनहरुमा कोरोनाको संक्रमण भयाबहको रुपमा फैलँदै गएको छ । जसका कारण अमेरिकामा पछिल्लो केहीदिन यता दैनिक १ हजार भन्दा बढीको ज्यान जान थालेको छ । सोमबार र मंगलबारको तथ्यांकलाई मात्रै आधार बनाउने हो भने पनि अमेरिकामा यी दुईदिन अर्थात् पछिल्लो ४८ घण्टामा २ हजार ६ सय भन्दा बढीको ज्यान गै सकेको छ ।

सोमबार स्थानीय समय अनुसार दिउँसो २ बजेसम्म अमेरकाभर १ हजार २ सय ५५ जनाको ज्यान गएको थियो भने ३० हजार भन्दा बढी नयाँ संक्रमित फेला परेका थिए । यही अवधिमा १९ हजार ६ सय भन्दा बढीको उपचार समेत सफल भएको थियो । तर त्यसको २४ घण्टा वित्न नपाउँदै मंगलबार दिउँसो २ बजेसम्म अमेरिकामा थप १ हजार ४ सय ३ जनाको ज्यान गएको छ कोरोना संक्रमणका कारण । कोरोनाका कारण अमेरिकाभर यो समाचार तयार पार्दासम्म १२ हजार २ सय ७४ जनाले ज्यान गुमाईसकेका छन् भने ३ लाख ८६ हजार ५ सय ७१ संक्रमित भेटिएका छन् ।

न्यूर्योक नराम्ररी प्रभावित
अमेरिकाका अधिकांश राज्यहरु कोरोनाको प्रकोपमा परेको भएपनि राजधानी न्यूर्योक नराम्ररी प्रभावित बनेको छ । कोरोनाका कारण मंगलबारमात्रै न्यूर्योकमा ७ सय ३१ जनाले ज्यान गुमाएका छन् । मंगलबार न्यूर्योकमा झण्डै ७ नयाँ कोरोना संक्रमित भेटिएका छन् । न्यूर्योकमा हालसम्म १ लाख ३७ हजार भन्दा बढी कोरोना संक्रमित फेला परिसकेका छन् ।

सोमबार न्यूर्योकमा ५ सय ९९ जनाले ज्यान गुमाएका थिए । न्यूर्योकपछि सबैभन्दा बढी प्रभावित राज्यको रुपमा न्यूजर्सी रहेको छ । जहाँ आजमात्रै २ सय २९ जनाले ज्यान गुमाएका छन् । यस्तै लौसिन्या, पेन्सिलभेनिया, जर्जिया,फ्लोरिडालगायतका राज्यहरुमा पनि दैनिक दर्जनौं मानिसहरुको ज्यान कोरोनाकै कारण गैरहेको छ ।

राष्ट्रपति डोनाल्ड ट्रम्पले अझै केही साता अमेरिकाको लागि दुःखद रहेको भन्दै सुरक्षा सावधानी अपनाउनका लागि नागरिकहरुलाई आग्रह गरेका छन् ।