भारतले मिचेको भूमि फिर्ता ल्याउन कठिन छ, तर ल्याएरै छाड्छौं : प्रधानमन्त्री

Best Khabar Team | २०७७ जेठ ६ गते मंगलबार

१९ मे, २०२०
काठमाडौं । प्रधानमन्त्री केपी शर्मा ओलीले भारतले अतिक्रमण गरेको नेपाली भूमिलाई समेटेर सरकारले नयाँ नक्सा सार्वजनिक गर्ने भन्दै अब अतिक्रमित भूमि पनि नेपालको पक्षमा ल्याएरै छाड्ने स्पष्ट पारेका छन् ।

उनले संसदमा आज नीति तथा कार्यक्रममाथि सांसदहरुले राखेको प्रश्नको जवाफ दिने क्रममा राष्ट्रिय हितका लागि आफू कसैको दबाबमा नपर्ने स्पष्ट पारेका छन् । भारतले अतिक्रमण गरेको लिम्पियाधुरासम्मको जमिनलाई समावेश गरेर छिट्टै नेपालको नयाँ नक्सा सार्वजनिक गर्ने उनको भनाई छ । अतिक्रमित भूमि फिर्ता ल्याउन सरकारले आवश्यक ढंगले कुटनीतिक छलफल र आन्तरिक तयारी पनिसँगै अघि बढाउने उनको भनाई छ ।

सरकार विदेशीको दबाबमा परेको भन्दै सांसदहरुले आलोचना गरेपछि प्रधानमन्त्री ओलीले अरुको उक्साहटमा लागेर राष्ट्र र राष्ट्रियता विरुद्ध कहिल्यै काम नगर्ने स्पष्ट पारे । उनले कुनैपनि हालतमा भारतले हड्पेको भूभाग फिर्ता लिने बताएका छन् । यद्यपि यो कार्य कठिन हुने भएपनि चुनौतीको सामना गरेरै भएपनि भूमि फिर्ता लिइछाड्ने प्रतिबद्धता प्रधानमन्त्रीले व्यक्त गरे । भारतसँग मैत्रिपूर्णरुपमा वार्ता गरेर तथ्य प्रमाण पेश गरेर आफ्नो भूमि फिर्ता लिने उनको प्रतिबद्दता छ ।

भारतसँग तनावरहित एवं सुमधुर ढंगले वार्ता र छलफल गर्ने उनले स्पष्ट पारे । भारतसँगको सम्बन्धलाई कुनैपनि हिसावले विग्रन नदिनका लागि सरकार सचेत रहेको प्रधानमन्त्रीले बताएका छन् । उनले विगतमा लडाईँको बेला गरिएको सहमतिको आधारमा भारतले नेपालको भूमि अतिक्रमण गर्नु दुर्भाग्यपूर्ण भएको बताए। यसलाई स्वीकार गर्न नसकिने बताए । वार्ताबाट समस्याको समाधान खोज्ने भन्दै भारतसँग मित्रवत् व्यवहार गर्ने उनले स्पष्ट पारे ।