काठमाडौंको ग्राण्डी अस्पतालका कर्मचारीसहित थप ३२ मा कोरोना

Best Khabar Team | २०७७ जेठ १० गते शनिबार

२३ मे, २०२०
काठमाडौं । काठमाडौंको टोखा नगरपालिकामा रहेको ग्राण्डी अस्पतालका एक कर्मचारीसहित थप ३२ जनामा कोरोना संक्रमण भेटिएको छ । यसअघि स्वास्थ्य मन्त्रालयले दिएको जानकारीमा काठमाडौंका ३५ वर्षका एक पुरुषसहित थप ३२ जनामा आज कोरोना संक्रमण भेटिएको उल्लेख थियो ।

काठमाडौंका ३५ वर्षका भनिएका ती पुरुष ग्राण्डी अस्पतालमा कार्यरत एक कर्मचारी भएको अस्पताल स्रोतको भनाई छ । अस्पताल स्रोतका अनुसार ती व्यक्ति स्वास्थ्यकर्मी नभै अस्पतालको अन्य विभागमा काम गर्ने कर्मचारी हुन् । कर्मचारी संक्रमित भेटिएपछि अहिले अस्पताललाई सिल गरेर संक्रमित व्यक्तिको सम्पर्कमा रहेकाहरुको तथ्याक संकलनको काम अघि बढाइएको छ । उनको अवस्था सामान्य रहेको मन्त्रालयको भनाई छ । मन्त्रालयले आज जारी गरेको नियमित स्वास्थ्य बुलेटिनका अनुसार कपिलवस्तुको बाणगंगा नगरपालिकामा १७ देखि ४२ वर्ष उमेर समूहका ७ जना पुरुष र एक महिलामा कोरोना संक्रमण देखिएको छ ।

यस्तै, सर्लाहीमा १२ जना पुरुष र बाराकी एक महिला गरी कुल १३ जनामा कोरोना संक्रमण देखिएको छ । यसरी भेटिएका १२ जना पुरुषहरु सर्लाही जिल्लाको गोडैता र कविलासी नगरपालिकाका स्थायी वासिन्दा भएको बताइएको छ । यस्तै बाराको कलैयाकी एक महिलामा पनि कोरोना देखिएको छ । यता रुपपन्देहीको गैडहवा र रोहिणी गाउँपालिकामा २० देखि ५५ वर्ष उमेर समूहका ८ जनामा कोरोना संक्रमण देखिएको छ भने चितवन भरतपुरका ५२ वर्षका एक पुरुषमा कोरोना देखिएको छ ।

आज थपिएका सबै संक्रमितको अवस्था सामान्य रहेको र उनीहरु चिकित्सकको निगरानीमा रहेको मन्त्रालयले जारी गरेको विज्ञप्तिमा उल्लेख छ । यो सँगै देशभर कोरोना संक्रमितको संख्या ५ सय ४८ पुगेको छ । हालसम्म ३ जनाको कोरानाका कारण ज्यान गएको छ । यस्तै कोरोनाको संक्रमणमा परी उपचार गराईरहेका मध्ये ७० जना कोरोनालाई जितेर घर फर्केका छन् ।

Comment from facebook