उपत्यकामा कोरोना : ललितपुरमा ३ को मृत्यु

Best Khabar Team | २०७७ मंशिर २३ गते मंगलबार

१२ अगस्ट, २०२०
काठमाडौं । कोरोना संक्रमणबाट काठमाडौं उपत्यकामा पछिल्लो २४ घण्टामा थप ३ जनाको ज्यान गएको छ । ललितपुरका विभिन्न अस्पतालमा उपचारका क्रममा उनीहरुको मृत्यु भएको हो । जिल्ला जनस्वास्थ्य कार्यालय ललितपुरका अनुसार ललितपुरको किस्ट अस्पताल, पाटन अस्पताल र मेडिसिटी अस्पतालमा उपचारका क्रममा तीन जनाको ज्यान गएको हो । कोरोनाबाट ज्यान गुमाउनेमा २ महिला र एक पुरुष रहेका छन् ।

पाटन अस्पतालमा उपचारमा रहेकी जनकपुरकी एक महिलाको अस्पतालमा निधन भएको छ । पाटनमा ज्यान गुमाएकी ती महिलामा सामान्य झाडाबान्ता र ज्वरोको समस्या देखिएको थियो । यस्तै मेडिसिटीमा उपचारमा रहेका ७१ वर्षका एक पुरुषको ज्यान गएको छ । उनी जनकपुरका स्थायी बासिन्दा भएको बताइएको छ । उनी निमोनियासम्बन्धी समस्या देखिएपछि अस्पतालमा उपचारार्थ भर्ना भएका थिए ।

उपचारका क्रममा उनको आज बिहान ज्यान गएको अस्पतालले जनाएको छ । यता किस्ट अस्पतालमा पनि उपचारका क्रममा रहेकी एक महिलाको ज्यान गएको छ । अस्पतालमा उपचारमा रहेकी ७१ वर्षकी एक महिलाको हिजो साँझ ज्यान गएको छ । उनी पनि उच्च रक्तचापलगायतका विभिन्न समस्याका कारण अस्पताल भर्ना भएकी थिइन् ।

पछिल्ला दिनहरुमा काठमाडौं उपत्यकाभित्र पनि कोरोना संक्रमितहरुको संख्या बढ्दो क्रममा रहेको छ । विशेष गरी लकडाउन खुल्ला गरिएसँगै राजधानी भित्रनेहरुको चाप ह्वात्तै बढेपछि संक्रमितको संख्या पनि बढेको हो ।