देश फर्कन मागगर्दै सिंहदबार पुगेका दर्जनौं चिनियाँ नागरिक र प्रहरीबीच झडप, ३८ पक्राउ

Best Khabar Team | २०७७ श्रावण २१ गते बुधबार

०८ मे, २०२०
काठमाडौं । मुलुकको प्रमुख प्रशासनिक निकाय सिंहदबारको प्रवेशद्वारामा शुक्रबार अपरान्ह एउटा अनौठो दृश्य देखियो । लकडाउनका कारण सिँगो देश ठप्पप्रायः बनेको अवस्थामा मुलुकको प्रमुख प्रशासनिक निकाय सिंहदबारमा भने अवस्था त्यस्तो थिएन । झण्डै एकदर्जन बढी सुरक्षाकर्मी सिंहदबारको गेटमा तैनाथ देखिन्थे । छिटफुट गाडीहरु सिंहदबार प्रवेश गर्दै गरेका देखिन्थे, त्यो पनि सुरक्षाकर्मीको कडा चेकजाँच पछि मात्रै ।

यसैपनि व्यापक सुरक्षा चेकजाँचपछि पास लिएर वा मान्यताप्राप्त परिचय पत्र बोकेर कडा सुरक्षा घेरा पार गरेपछिमात्रै सिंहदबार प्रवेश गर्न पाइन्छ । त्यसमा अहिलेको विश्वव्यापी कोरोनाको प्रकोप अनि लाकडाउन । झण्डै ४ दर्जन चिनियाँ नागरिक शुक्रबार सिंहदबार प्रवेश गर्ने सोचका साथ सिंहदबारको दक्षिण गेटमा पुगेका थिए ।

तर त्यहाँ सुरक्षामा रहेका प्रहरीले उनीहरुलाई प्रवेश गराउन नसकिने बतायो । त्यसपछि सुरक्षामा खटिएका प्रहरी र चिनियाँ नागरिकबीच भनाभन भयो । पनि विवाद बढ्दै गएपछि प्रहरी र उनीहरुबीच झडप नै भयो । प्रहरीले उनीहरुमाथि बल नै प्रयोग गरेको छ । केही समय अघि ती चिनियाँ नागरिकले घर फर्कन पाउनुपर्ने माग गर्दै राजधानीको भृकुटीमण्डपस्थित पर्यटन बोर्डमा धर्ना दिएका थिए । तर उनीहरुको मागको सुनुवाई नभएपछि उनीहरु आज मुलुकको प्रमुख प्रशासनीय निकायमा आफूहरुको माग सुनुवाईका लागि गएका थिए ।

तर मुलगेटबाटै प्रवेश गर्न पाएनन् । फलस्वरुप झडपको अवस्था सिर्जना भयो । हाल सिंहदबारको गेटबाट ३८ जना चिनियाँ नागरिकलाई पक्राउ गरी प्रहरी परिसर काठमाडौ पु-याइएको छ । उनीहरुले जर्वजस्ती रुपमा सिंहदबार प्रवेश गर्न खोजेको र त्यसलाई रोक्न खोज्दा झडपमा उत्रिएपछि नियन्त्रणमा लिइएको प्रहरीको भनाई छ । झडपमा परी केही चिनिया नागरिक र सिंहदरबार प्रहरी वृत्तका डिएसपी हरि बस्नेत घाइते भएको प्रहरीले जनाएको छ । उनीहरुलाई वीर अस्पतालमा उपचारका लागि लगिएको छ ।