युरोपबाट काठमाडौंं आएकी १९ वर्षकी युवतीमा भेटियो कोभिड–१९, टेकु अस्पतालमा उपचार हुँदै

Best Khabar Team | २०७६ चैत्र १० गते सोमबार

२३ मार्च, २०२०
काठमाडौं । युरोपेली मुलुक फ्रान्सबाट नेपाल फर्किएकी एक नेपाली युवतीमा कोरोना भाइरस (कोभिड १९) को संक्रमण भेटिएको छ । चैत्र ४ गते फ्रान्सको राजधानी पेरिस हुँदै काठमाडौं आएकी ती युवतीमा कोरोनासँग मिल्दोजुल्दो लक्षण देखिएपछि उनलाई शुक्रराज ट्रपिकल तथा सरूवा रोग अस्पतालमा मा राखेर उपचार शुरु गरिएको थियो ।

उनको ल्याव परीक्षणका क्रममा कोरोनाको संक्रमण भेटिएको पुष्टि भएको स्वास्थ्य मन्त्रालयले आज काठमाडौंमा गरेको पत्रकार सम्मेलनमा जानकारी दिएको छ । ती युवतीसँगै विमानमा आउनेहरुको बारेमा तत्काल जानकारी लिने र उनीहरुलाई पनि आइसोलेसनमा राख्ने विषयमा तत्काल काम अघि बढाउने स्वास्थ्यमन्त्री भानुभक्त ढकालले जानकारी दिए ।

उपचारमा रहेकी ती युवतीको अवस्थामा सामान्य रहेको बताइएको छ । उनी कतार एयरलाइन्सको विमान हुँदै पेरिसबाट कतारको राजधानी दोहा हुँदै चैत्र ४ गते काठमाडौं आएकी थिइन् । केही साताअघि अध्ययनका लागि चीन पुगेका एक नेपाली युवकमा पनि कोरोनाको संक्रमण देखिएको भएपनि उनी स्वास्थ्यलाभ गरी नियमित रुपमा काममा फर्किसकेका छन् ।

यसैबीच मन्त्रालयले विगतमा पनि नेपालमा एकजनामा कोरोना देखिएको र उनी पूर्णरुपमा निको भैसकेकाले यसका विषयमा अनावश्यक हल्ला नगर्न र घरभित्रै बसेर कोरोना नियन्त्रण गर्ने सरकारको अभियानमा सहयोग गर्न सबैलाई आग्रह गरेको छ ।