कुबेत, बहराइन र दुबईमा शुक्रबारमात्रै थप ३५ नेपालीमा कोरोना संक्रमण

Best Khabar Team | २०७७ बैशाख ५ गते शुक्रबार

१७ अप्रिल, २०२०
मानमा । बैदेशिक रोजगारीको लागि बहराईन आएका थप २७ जना नेपालीमा कोरोना संक्रमण भेटिएको छ । परीक्षणका क्रममा आज मात्रै थप २७ जनामा कोरोना संक्रमण भेटिएको हो ।

एउटै कम्पनीमा काम गर्ने उनीहरुमा कोरोनाको संक्रमण देखिएको भएपनि उनीहरुको परिचय खुलाइएको छैन । संक्रमितहरुलाई अहिले अस्पतालमा उपचार थालिएको छ । यद्यपि उनीहरुको अवस्था सामान्य रहेको बताइएको छ । यो सँगै बहराईनमा कोरोना संक्रमित नेपालीको संख्या ४९ पुगेको छ ।

बहराईनस्थित नेपाली दुतावासका अनुसार कम्पनीमा काम गर्ने भारतीय र अन्य देशका नागरिकहरुमा पनि कारोनाको संक्रमण भएको छ । उनीहरुलाई पनि अस्पतालमा उपचारका लागि भर्ना गरिएको छ । यस्तै यूएई र कुबेतमा रहेका नेपालीहरुमध्ये थप ७ जनामा कोरोना संक्रभण पुष्टि भएको छ ।

दुतावासका अनुसार युएईको एउटै कम्पनीमा कार्यरत ६ जना नेपाली र कुवेतमा कार्यरत एक नेपाली गरी थप ७ जनामा कोरोना संक्रमण पुष्टि भएको हो । उनीहरुको पनि अवस्था सामान्य रहेको छ । दुतावासले कोरोना संक्रमणबाट बच्नका लागि आवश्यक सुरक्षा सावधानी अपनाउन नेपालीहरुलाई आग्रह गरेको छ ।