अस्ताईन् रेडियो नेपालकी पहिलो गायिका ‘रानुदेबी’

Best Khabar Team | २०७७ बैशाख १९ गते शुक्रबार

०१ मे, २०२०
काठमाडौं । रेडियो नेपालमा पहिलो पटक गीत रेकर्ड गर्ने गायिका रानुदेवी अधिकारीको गएराति निधन भएको छ । विगत लामो समयदेखि पार्किसन्स र अल्जाईमर्स रोगबाट पीडित अधिकारीको ८८ वर्षको उमेरमा गएराति काठमाडौं मेडिकल कलेज सिनामंगलमा निधन भएको हो । स्वास्थ्यमा गम्भीर समस्या देखिएपछि उनलाई कान्छी छोरीले अस्पताल पु-याएकी थिइन् ।

पूर्वी नेपालको विराटनगरमा जन्मिएकी रानुदेवी तारणीप्रसाद कोइरालाको प्रेरणाबाट राणा विरोधी आन्दोलनमा होमिएकी थिइन् भने उनले २००७ सालमा विराटनगरमा स्थापना भएको रेडियो नेपालमा पहिलोपटक गीत रेकर्ड समेत गराएकी थिइन् । उनको बाल्यकाल भारतको बनारसमा वितेको थियो । विशेष गरी उनले विराटनगरमा स्थापना भएको रेडियो नेपालमा पहिलोपटक जागरणसम्बन्धी गीत गाउने गरेकी थिइन् ।

‘जागे नेपाली’ ‘उठे नेपाली’, ‘जुनेली रात हजुर’लगायत उनले गाएका दर्जनौं गीतहरु अहिलेपनि चर्चाको शिखरमा रहेका छन् । जुन गीतहरु आज कालजयी गीत बनेका नेपाली सांगीतिक संग्रहमा संग्रहित छन् । २०३६ सालको शिक्षक आन्दोलनमा होमिएपछि उनी केही समय जेल समेत परेकी थिइन् । २०४६ सालको जनआन्दोलनपछि नेपाल महिला संघ मोरङको अध्यक्ष बनेकी उनले करिब ३० वर्ष अध्यापन पेशासमेत अँगालेकी थिइन् ।

स्वर्गीय रानुदेवी अधिकारीका एक छोरा र दुई छोरी छन्। उनको गएराति नै हिन्दु धार्मिक परम्परा अनुसार पशुपति आर्यघाटमा अन्तेष्टि गरिएको उनको परिवारले जनाएको छ ।