सेनाको गाडी सडकबाट छाँगामा खस्यो, १ को मृत्यु, ६ घाइते

Best Khabar Team | २०७६ माघ २९ गते बुधबार

१२ फेब्रुअरी, २०२०

सल्यान । नेपाली सेनाको एउटा गाडी सल्यानको कुपुरकोटमा दुर्घटनामा परेको
छ । सो दुर्घटनामा परी नेपाली सेनाका जमदार यादवप्रसाद धरेलेको ज्यान गएको हो । मृतक जमदार धरेल मकवानपुरको हेटौंडाका स्थायी बासिन्दा हुन् । सो दुर्घटनामा ६ जना घाइते भएका छन् । घाइतेहरुको स्थानीय अस्पतालमा उपचार भै रहेको छ ।

सल्यानको सिमखर्क ब्यारेकबाट बुटवलका लागि छुटेको लु १ ग १२३ नम्वरको सेनाको सो गाडी कपुरकोट गाउँपालिकाको चोरखोलामा दुर्घटनामा परेको थियो । सो गाडी सडकबाट तल रहेको छाँगामा खसेको बताइएको छ । गाडीभित्र नेपाली सेनाले बम तथा हतियारहरु बोकेर सैन्य प्रयोजनका लागि बुटबल तर्फ जाँदै गरेका थिए ।

दुर्घटनामा सेनाका मेजर ईश्वर सिलवाल, जय प्रसाद वोहोरा, विशाल गुरुङ, विपिन श्रेष्ठ, मोहनलाल थापा, थर नखुलेका रोशन नामका एक सैनिक घाइते भएका छन् । घाइतेहरुलाई प्राथमिक उपचार पछि सेनाको हेलिकोप्टरबाट काठमाडौंको छाउनीस्थित सैनिक अस्पतालमा उपचारार्थ भर्ना गरिएको छ ।

घटनाको बारेमा थप अनुसन्धानका लागि बुटबल र सल्यानबाट थप सैनिक तथा प्रहरीको टोली घटनास्थल पुगेको छ । अहिले घटनास्थललाई प्रहरी तथा सेनाले नियन्त्रणमा लिएको छ ।