आगामी बैशाख १८ सम्मका लागि नेपाल आउने सबै विदेशी पर्यटकलाई नेपाल प्रवेशको भिषा बन्द, हवाई र स्थलमार्ग दुबैमा यो नियम लागू हुने

Best Khabar Team | २०७६ चैत्र १ गते शनिबार

१४ मार्च, २०२०
काठमाडौं । सरकारले आजराति (आइतबार बिहान १ बजे) देखि लागूहुने गरी काठमाडौं विमानस्थल हुँदै नेपाल प्रवेश गर्ने तथा विभिन्न नाकाबाट नेपाल आउने विदेशी पर्यटकहरुलाई भिषा नदिने भएको छ । विश्वव्यापी रुपमा फैलिएको कोरोना भाईरसको प्रकोप रोक्नका लागि रक्षामन्त्री ईश्वर पोखरेल नेतृत्वको विशेष समितिले गरेको निर्णय आजदेखि कार्यान्वयनमा आएको हो ।

समितिले यसअघि चैत १ गतेदेखि पर्यटकहरुलाई एक महिना १८ दिनसम्मका लागि नेपाल प्रवेशमा दिईँदै आएको अनअराईभल भिषा रोक्ने निर्णय फागुन २९ मा गरेको थियो । सोही निर्णय आजदेखि कार्यान्वयनमा आएको हो ।

यसअघि सरकारले चीन, इरान, जापान, दक्षिण कोरिया, इटाली, फ्रान्स, जर्मनी र स्पेन गरी ८ देशका नागरिकलाई अनअराईभल भिषा नदिने निर्णय गरेको थियो । आज बिहान १ बजेदेखि लागू भएको यो निर्णय आगामी बैशाख २०७७ वैशाख १८ गतेसम्मका लागि लागू हुने छ । त्यसपछि कोरोनाको विश्वव्यापी प्रभावलाई हेरेर थप निर्णय गरिने समितिले जनाएको छ ।

यो नियम गैर आवासीय नेपालीहरू जसले गैरआवासीय नेपाली परिचयपत्रका आधारमा विमानस्थल वा अन्य नाकामा भिषा प्राप्त गर्दै आएका छन्, उनीहरुमा पनि लागू हुने बताइएको छ । यस्तै सरकारले विदेशयात्राबाट फर्केका कामदार, विद्यार्थी तथा पर्यटक भिषामा विदेश गएकाहरुलाई पनि नेपाल फर्केपछि १४ दिन सेल्फ क्‍वारेन्टाइनमा बस्नुपर्ने व्यवस्था गरेको छ ।

सरकारले, विदेशमा रहेका नेपाली नागरिकहरूलाई अत्यावश्यक अवस्थामा बाहेक यात्रा नगर्न र विदेशमा रहँदा उच्च सतर्कता र सावधानी अपनाउन आग्रह गर्दै नेपालमै रहेकाहरुलाई पनि विशेष सतर्क रहन भनेको छ ।

Comment from facebook