२०७७ बैशाख ३ सम्म ‘लकडाउन’

Best Khabar Team | २०७६ चैत्र २४ गते सोमबार

०६ मार्च, २०२०
काठमाडौं । सरकारले ‘लकडाउन’को समय दोश्रोपटक थप गरेको छ । नेपाल सरकार मन्त्रीपरिषद्को आज बसेको बैठकले आगामी २०७७ साल बैशाख ३ गतेसम्म हाल जारी रहेको लकडाउनको समय बढाउने निर्णय गरेको हो । यसअघि सरकारले ८ दिनका लागि थप गरेको लकडाउनको समय सकिनै लाग्दा आज मन्त्रीपरिषद्को बैठक बसेर लकडाउन दोश्रो पटक थप गर्ने निर्णय गरेको हो । सरकारले कारोना भाइरसको संक्रमण फैलन नदिन र आम नागरिकको सुरक्षाको लागि भन्दै लकडाउनको समय थप गर्नुपरेको जनाएको छ ।

लकडाउनको समयमा पनि अत्यावश्यकीय सामग्रीको आयात तथा ढुवानी गर्ने सवारी साधनहरुलाई भने निर्वाध रुपमा सञ्चालन हुन दिने निर्णय गरेको छ । केहीदिन अघि कैलाली र कञ्चनपुरमा भारतबाट आएकाहरुमा कोरोनाको संक्रमण देखिएपछि सरकारले लकडाउनको समय लम्ब्याउने निर्णय गरेको हो । आज प्रधानमन्त्रीको सरकारी निवास बालुवाटारमा बसेको मन्त्रीपरिषद्को बैठकले लकडाउनको समय थप लम्ब्याउने निर्णय गरेको सरकारका प्रवक्ताले जानकारी दिएका छन् ।

यो सँगै नयाँ वर्ष २०७७ साल बैशाख ३ गतेसम्म मुलुक पूर्णरुपमा लकडाउन हुने भएको छ । यसअघि सरकारले गत चैत्र ११ गतेदेखि कोरोनाको संक्रमण रोक्नका लागि भन्दै लकडाउन गर्ने निर्णय गरेसँगै लकडाउन कार्यान्वयनमा आएको थियो । यस्तै चैत्र १८ गतेदेखि पुनः दोश्रो चरणको लकडाउनको समय थप भएको थियो ।

लकडाउनको समयमा घरबाहिर ननिस्कन र अत्यावश्यकीय सामग्री तथा सेवा प्रवाहको लागि नजिकको प्रहरी वा स्थानीय जनप्रतिनिधिलाई खबर गर्न आग्रह गरेको छ ।