कोरोना संक्रमित बढ्न थालेपछि युरोपका अधिकांश देशमा फेरि लकडाउन तथा कर्फ्यू , हल्याण्डमा कर्फ्यूको विरोधमा प्रदर्शन

Best Khabar Team | २०७७ माघ १२ गते सोमबार

२५ जनवरी, २०२१
लिंकरोभर, बेल्जियम । कोरोना भाइरसको दोश्रो लहरले यतिबेला युरोपका अधिकांश देशको जनजीवन अस्तव्यस्त बन्न थालेको छ । कोभिड १९ को दोश्रो लहर (वेभ) का कारण युरोपका अधिकांश देशले आफ्नो देशभित्र फरक फरक प्रकृतिको प्रतिबन्ध लगाएका छन् । कतिपय देशले कोरोना संक्रमण फैलन नदिन भन्दै संकटकाल तथा कफ्र्युको घोषणा गरेका छन् ।

**हल्याण्डमा प्रदर्शनमा उत्रिएका प्रदर्शनकारी र प्रहरी । तस्वीर साभार** : **न्यूयोर्क टाइम्स ।**

युरोपेली मुलुकहरुले विशेष गरी अत्यावश्यकीय बाहेक अन्य सबै यात्रामा प्रतिबन्ध लगाउने निर्णय गरेका छन् । विशेषगरी युरोपका पोर्चुगल, स्पेन, फ्रान्स, बेल्जियम, जर्मनी, स्वीट्जरल्याण्डलगायतका देशले आफ्ना देशभित्र प्रवेश गर्ने तथा देशबाट बाहिरिने यात्रुहरुमाथि कडा प्रतिबन्ध लगाउने निर्णय गरेका छन् । पोर्चुगलमा त्यहाँको सरकारले आगामी जनवरी ३१ तारिखसम्मका लागि विद्यालयहरु बन्द गरेको छ । यस्तै रेस्टुरेन्टहरुलाई ‘टेकवे’सेवामात्रै सञ्चालनको अनुमति प्रदान गरेको छ ।

पोर्चुगलमा यसअघि गत वर्षको मार्चमा पहिलो पटक यस्तै खालको कडा प्रतिबन्ध लगाइएको भएपछि अवस्था सामान्य बन्दै गएपछि जुन महिनादेखि पर्यटकीय गतिविधिहरु बढ्न थालेको थियो । तर पछिल्लो समयमा कोरोना संक्रमितको दैनिक संख्या १४ हजारको हाराहारीमा पुग्न थालेपछि सरकारले कडा नियम लागू गरेको छ ।

**लकडाउनपछि सुनसान बनेको पोर्चुगलको पर्यटकीय क्षेत्र कोरतेइरा । तस्वीर** : **बेष्टखबर डटकम ।**

अत्यावश्यकीय काम बाहेकको अन्य यात्रा प्रतिबन्ध लगाउनुका साथै पोर्चुगल सरकारले सार्वजनिक पार्क, खेलमैदानलगायतमा राखिएका कुर्चीहरुमा मानिसहरुलाई बस्न तथा समुद्र छेउमा जान समेत प्रतिबन्ध लगाएको छ । यस्तै युरोपको अर्को मुलुक नेदरल्याण्डले दोश्रो विश्वयुद्दपति पहिलोपटक कफ्र्युको घोषणा गरेको छ । नेदरल्याण्डमा कोरोना संक्रमितको दर बढ्न थालेपछि सरकारले शनिबारदेखि लागू हुने गरी आगामी फेब्रुअरी पहिलो सातासम्मका लागि कफ्र्युको घोषणा गरेको छ। कफ्र्युको समय रातिको ९ बजेदेखि बिहानको ५ बजेसम्म कायम रहने त्यहाँको सरकारको भनाई छ ।

सरकारको गरेको कफ्र्यु घोषणकोविरुद्धमा नागरिकहरुले नेदरल्याण्डका दर्जनौं शहरमा प्रदर्शन गरेका छन् । कतिपयस्थानमा प्रदर्शनकारी र प्रहरीबीच दोहोरो झडपसमेत भएको छ । प्रर्दनकारीहरुले राजधानी आम्सर्टड्याम्लगायतका केही क्षेत्रमा विरोध प्रदर्शन गर्नुका साथै आगजनी समेत गरेका छन् । विरोधमा उत्रिएका प्रदर्शनकारीले कतिपय स्थानमा लुटपाटका घटना समेत घटाएको सरकारी सञ्चारमाध्यमहरुले जनाएका छन् ।

यही क्रममा प्रहरीले शहरका विभिन्न स्थानबाट सयौं प्रदर्शनकारीलाई पक्राउ गरेको छ । दक्षिण क्षेत्रमा रहेको आइन्डहोभन नामक शहरमा प्रहरी र प्रदर्शनकारीबीच भएको झडपमा केही प्रदर्शनकारीहरु घाइते भएका छन् । प्रहरीले स्थितिलाई नियन्त्रणमा लिनका लागि अश्रु ग्याँस प्रहार गरेको छ । प्रदर्शनकारीहरुले त्यस क्षेत्रमा दर्जनौं गाडीहरुमा आगजनी गरेका छन् । यस्तै युरोपेली मुलुक बेल्जियमले पनि शनिबारबाट लागूहुने गरी अतयावश्यकबाहेकका सबै यात्राहरुमा प्रतिबन्ध लगाउने निर्णय गर्दै यसको कार्यान्वयनका लागि प्रहरी परिचालन गर्ने निर्णय गरेको छ ।

**बेल्जियमको सडकमा सुरक्षामा खटिएका प्रहरी । तस्वीर साभार : न्यूज विक ।**

आगामी मार्च १ सम्मका लागि बेल्जियम सरकारले बेल्जियम आउने तथा यहाँबाट बाहिरिने यात्रुहरुलाई (अति आवश्यकबाहेक) प्रतिबन्ध लगाउने निर्णय गरेको छ । अति आवश्यकीय कामको लागि जान लागेको प्रमाणसहितको कागजात हेरेपछि मात्रै उनीहरुलाई गन्तव्यमा जान दिने नदिने विषयमा निर्णय लिइने सरकारको भनाई छ । सभा समारोह, पारिवारिक भेटघाटका कार्यक्रमलगायतका बढी मानिसहरुको भेला हुने गतिविधि सबै बन्द गरिएको बेल्जियम सरकारले जनाएको छ । यस्तै युरोपेली मुलुक स्वीट्जरल्याण्डले युरोपबाट आउने सबै यात्रुरुले अनिवार्य रुपमा पिसिआर नेगेटिभ रिपोर्ट पेश गर्नुपर्ने नियम लागु गरेको छ ।

फ्रान्सले पनि कोरोना संक्रमण बढ्न नदिन विभिन्न गतिवधिहरुमा प्रतिबन्ध लगाएको छ । यस्तै, नर्वे, जर्मनीलगायतका देशले समेत कोरोना संक्रमणलाई मध्यनजर गर्दै धेरै मानिसहरुको जमघन हुन नदिन कडा मापदण्ड अघि सारेका छन् ।

Comment from facebook