नेपालमा कोरोनाबाट चौथो मृत्यु : दाहसंस्कार गरेको ८ दिनपछि कोरोना पुष्टि

Best Khabar Team | २०७७ जेठ १२ गते सोमबार

२५ मे, २०२०
बारा । वीरगञ्जमा गत जेठ ४ गते उपचारका क्रममा निधन भएका एक व्यक्तिमा कोरोना संक्रमण पुष्टि भएको छ । अस्पतालमा ज्यान गुमाएका व्यक्तिको दाहसंस्कार गरेको ८ दिनपछि उनमा कोरोना संक्रमण पुष्टि भएको नशनल मेडिकल कलेज वीरगञ्जले जनाएको छ । सोही कलेजमा उपचारका क्रममा रहेका बाराको करैयामाइ गाउँपालिका वडा नम्बर ७ का ७० वर्षका बृद्दको कोरोनाबाट मृत्यु भएको पुष्टि जिल्ला जनस्वास्थ्य कार्यालयले आज गरेको हो ।

रिपोर्टको पूर्नपुष्टिका लागि जिल्ला हुँदै काठमाडौंसम्म स्वाब पठाइएको र त्यसको रिपोर्ट प्राप्त हुन समय लागेकोले ढिलोगरी मात्रै उनमा कोरोना संक्रमण भएको पुष्टि भएको अस्पतालको भनाई छ । नारायणी अस्पतालको प्रयोशगालाले उनमा कोरोना संक्रमण भएको पुष्टि गरेपछि नेपालका कोरोनाबाट मृत्यु हुने उनी चौथो नागरिक भएका छन् । नारायणी अस्पतालमा गरिएको स्वाब परीक्षणमा उनमा कोरोना पुष्टि भएपनि पूर्नपुष्टिका लागि स्वाब काठमाडौं पठाइएको र काठमाडौंबाट पनि पोजेटिभ रिपोर्ट आएको जनस्वास्थ्य कार्यालयको भनाई छ ।

उनी दम तथा निमोनियासम्बन्धी समस्याबाट ग्रस्त भएपछि गएको जेठ २ गते अस्पतालमा उपचारार्थ भर्ना भएका थिए । अस्पतालको अघि सघन उपचार कक्षमा राखेर उनको उपचार शुरु गरिएको थियो । तर ती व्यक्तिमा कोरोनासँग मिल्दोजुल्दो लक्षण देखिएपछि उनको स्वाब संकलन गरी कोरोना परिक्षण गरिएको थियो । जेठ ४ गते नै अस्पतालमा निधन भएका ती बृद्दाको शव परिवारलाई जिम्मा लगाइएको र उनको सोही दिन अन्तेष्टि गरिएको थियो ।

मृतक बृद्दामा कोरोना संक्रमण पुष्टि भएपछि अब उनको सम्पर्कमा रहेका परिवार तथा अन्य व्यक्तिको स्वाब परीक्षण गर्ने तयारी भएको गाउँपालिकाले जनाएको छ । चौधरी थरका ती बृद्दको कोरोनाबाट मृत्यु भएको पुष्टि भएसँगै नेपालमा हालसम्म कोरोनाका कारण ज्यान गुमाउनेको संख्या ४ पुगेको छ । जसमा ३ पुरुष र एक महिला रहेका छन् ।