मध्यरातमा जुवाको खालमा प्रहरी छापा : वडाअध्यक्षसहित १६ पक्राउ

Best Khabar Team | २०७६ माघ १३ गते सोमबार

२७ जनवरी, २०२०
कैलाली । कैलालीको धनगढीमा एक स्थानीय जनप्रतिनिधिसहित १६ जनालाई प्रहरीले जुवा खेल्दै गरेको अवस्थामा पक्राउ गरेको छ । पक्राउ परेकाहरुको साथबाट प्रहरीले करिब २३ लाख नगद समेत बरामद गरेको छ ।

गएराति गोप्य रुपमा स्थानीय गोदावरी नगरपालिका वडा नम्बर १० मा रहेको एक घरमा जुवा खेलिरहेको अवस्थामा उनीहरु पक्राउ परेका हुन् । पक्राउ पर्नेमा सोही वडाका वडा अध्यक्ष रबिन्द्र शाहीसमेत अरु १५ जना रहेका छन् । उनीहरुले ठूलो रकम लिएर जुवा खेलिरहेको सूचना पाएलगत्तै प्रहरीको टोली घटनास्थलमा पुगेको थियो ।

सोही क्रममा स्थानीय तिलक अधिकारीको घरमा जुवा खेलिरहेको बेला वडा अध्यक्ष शाहीसहित १५ जनालाई प्रहरीले पक्रेको हो । जुवाको खालबाट प्रहरीले २२ लाख ८२ हजार रुपैयाँ नगद बरामद गरेको छ । पक्राउ परेकाहरुलाई प्रहरीले नियन्त्रणमा लिएर अनुसन्धान अघि बढाएको छ ।