प्रदेश ५ को राजधानी बुटबल र नाम लुम्बिनी कायम हुने सम्भावना प्रवल

Best Khabar Team | २०७६ पुष २९ गते मंगलबार

१४ जनवरी, २०२०
बुटबल । अन्ततः प्रदेश नम्बर ५ को राजधानी बुटबल कायम हुने सम्भावना प्रबल बनेको छ । प्रदेशहरुको नाम र राजधानी सिफारिस गर्न गठित विशेष समिति स्रोतका अनुसार प्रदेश नम्बर पाँचको राजधानी बुटबललाई नै कायम गर्नेमा बहुमत देखिएको छ ।

विशेष समितिका एक सदस्यका अनुसार यसअघि चर्चामा रहेको दाङ्ग भन्दा बुटबललाई नै प्रदेश नम्बर ५ को राजधानी बनाउन उपयुक्त हुने भन्ने विषयमा समिति सम्बद्ध बहुमत सदस्यले सहमति जनाएका छन् । केही सदस्यले दाङ्गलाई राजधानी बनाउन सुझाव दिएपनि बुटबल नै पायक पर्ने भन्दै यो नै कायम गर्ने सम्भावना बढी छ ।

सो प्रदेशको नाम भने लुम्बिनी प्रदेश राख्ने विषय टुंगिएको छ । प्रदेशको राजधानी र नामाकरण प्रदेशसभाको दुई तिहाई बहुमतले निर्णय गर्ने संवैधानिक व्यवस्था भए अनुसार समितिमा बहुमत नेकपा सम्बद्ध सदस्य रहेकोले यो प्रस्ताव पारित हुने सम्भावन प्रवल रहेको हो । यसअघि प्रदेश नम्बर ३ को राजधानी हेटौंडा राख्ने विषयमा सहमति बनिसकेको छ ।