गुल्मीमा पहिरोबाट खसेको ढुंगाले च्यापेर एकै घरका ४ जनाको मृत्यु

Best Khabar Team | २०७७ श्रावण १७ गते शनिबार

०१ अगस्ट, २०२०
तम्घास, गुल्मी । पहिरोसँगै खसेको ढुंगाले च्यापेर गुल्मीमा एकै परिवारका ४ जनाको ज्यान गएको छ । जिल्ला प्रहरी कार्यालयले दिएको जानकारी अनुसार रुरुक्षेत्र गाउँपालिकाको वडानम्बर ५ मा पर्ने आँटिपाटामा घरमाथिबाट खसेको ढुंगाले घरको आँगनमा बसिरहेका एकै परिवारका ४ जनाको मृत्यु भएको हो ।

मृत्यु हुनेमा स्थानीय बिना बोझेमाटी उनका ९ र ७ वर्षका दुई छोरा र १० महिनाका एक छोरीको ज्यान गएको हो । अविरल बर्षात्सँगै गएको पहिराले घरमाथिबाट ढुंगा समेत बगाएर ल्याएको र सोही ढुंगाले आँगनमा बसिरहेका उनीहरुलाई च्यापेको थियो । उनीहरु चारैजनाको घटनास्थलमै ज्यान गएको बताइएको छ । मृतक बिनाकी श्रीमान् भने रोजगारीका लागि भारतमा रहेको बताइएको छ ।

घटना गएराति ७ बजेतिरको भएपनि प्रहरी र स्थानीय वासिन्दाको सहयोगमा आज बिहानसम्म सबै शव निकालिएको छ । घटनास्थल आसपासमा रहेका आधादर्जन बढी घरहरु पहिरोको जोखिममा रहेको भन्दै उनीहरुलाई सुरक्षित स्थलतर्फ सार्न स्थानीय गाउँपालिकाले तयारी अघि बढाएको छ ।