नेपालमा बढ्दै कोरोना संक्रमित : २४ घण्टामा थपिए हालसम्मकै धेरै संक्रमित

Best Khabar Team | २०७७ असार ३ गते बुधबार

१७ जुन, २०२०
काठमाडौं । पछिल्लो केही समययता फैलिएको कोरोना संक्रमणलाई मध्यनजर गर्दा नेपालमा आउँदो केही साता कोरोना संक्रमण थप फैलने संकेत देखाएको छ । नेपालमा कोरोना संक्रमण शुरुभएयता आज एकैदिन सबैभन्दा बढी कोरोना संक्रमित भेटिएका छन् । देशका विभिन्न जिल्लामा गरिएको पिसिआर टेस्टका क्रममा विगत २४ घण्टा यता एकैपटक ५ सय ८६ जनामा कोरोना संक्रमण देखिएको स्वास्थ्य मन्त्रालयले पुष्टि गरेको छ ।

यो तथ्यांकलाई आधार मान्ने हो भने हालसम्म नेपालमा कोरोना संक्रमण शुरुभएपछि आज पहिलोपटक एकैदिन यतिधेरै मानिसहरु संक्रमित भेटिएका हुन् । सरकारले भने आफूहरुले परीक्षणको दायरा बढाएका कारण कोरोना संक्रमितहरुको संख्यापनि बढ्न गएको बताएको छ । तर जेठको पहिलो सातादेखि भारतमा रोकिएका नेपालीहरुलाई नेपाल ल्याउन शुरु गरिएसँगै नेपालमा पनि कोरोना संक्रमितको संख्या बढ्न थालेको हो ।

विगतमा लकडाउनका बेलासमेत त्यतिधेरै कोरोना संक्रमित नभेटिने गरेकोमा आज एकैपटक यतिधेरै कोरोना संक्रमित देखिएपछि थप सावधानी अपनाउनुपर्ने देखिएको छ । सरकारले असार १ गतेदेखि लागूहुने गरी देशभर लकडाउन खुकुलो गर्दै सरकारीलगायतका अधिकांश कार्यालयहरुको काम सञ्चालन गर्नका लागि अनुमति दिइसकेको छ । यस्तै एउटै जिल्लाभित्र निजी सवारी साधन सञ्चालनमा पनि सरकारले जोर विजोर प्रणाली अनुसार अनुमति दिइसकेको छ । नेपालमा आजसम्म कोरोना संक्रमितको संख्या ७ हजार १ सय ७७ पुगेको छ ।

यस्तै कोरोना संक्रमणमा परी २० जनाले ज्यान गुमाएका छन् । यस्तै हालसम्म कोरोनालाई जितेर १ हजार १ सय ६८ जना अस्पतालबाट घर फर्केका छन् ।