नेपालगञ्जमा तेश्रोपटक पनि एकैगाउँका व्यक्तिमा देखियो कोरोना, संक्रमितको संख्या ८२

Best Khabar Team | २०७७ बैशाख २३ गते मंगलबार

०५ मे, २०२०
खजुरा, नेपालगञ्ज । बाँकेमा तेश्रोपटक पनि एकै गाउँका थप ७ जनामा कोरोना संक्रमण भेटिएको छ । दुईदिनअघि १५ जना संक्रमित भेटिएको बाँकेको नेपालगञ्जमा आज तेश्रोपटक पनि थप ७ जनामा कोरोना संक्रमण भेटिएको हो । गत आइतबार नेपालगञ्जको सो क्षेत्रमा बस्ने ९ जनामा कोरोना संक्रमण भेटिएको थियो ।

यस्तै सोही दिन गरिएको थप परीक्षणका क्रममा साँझ अरु ६ जनामा कोरोना संक्रमण भेटिएको थियो । संक्रमितहरुको नेपालगजमा रहेको भेरी अञ्चल अस्पतालको आइसोलेसनमा उपचार भै रहेको छ । स्वास्थ्य तथा जनसंख्या मन्त्रालयले आज दिएको जानकारी अनुसार नेपालगञ्ज नगरपालिका वडा नम्बर ८ बस्ने २२, ३० र ४० वर्षका पुरुष तथा ९, ३२, ३४ र ५५ वर्षकी महिलामा कोरोना संक्रमण देखिएको हो ।

भेरी अञ्चल अस्पतालले गरेको स्वाब परीक्षणका क्रममा उनीहरुमा कोरोना संक्रमण पुष्टि भएको मन्त्रालयले जनाएको छ । यो सँगै नेपालमा कोरोना संक्रमितको संख्या ८२ पुगेको छ । जसमध्ये १६ जना उपचारपछि घर फर्केका छन् ।