बेलायतबाट नेपाल फर्कन चाहनेको संख्या ३९१ पुग्यो : जागीर गुमाएकादेखि विद्यार्थी भिषामा आएकाहरुसमेत फर्कनेको सूचीमा (सूचीसहित)

Best Khabar Team | २०७७ भाद्र २१ गते आइतबार

०९ जुन, २०२०
वेस्टह्याम, बेलायत । कोरोना भाइरस (कोभिड १९) को संक्रमणका कारण जारी लकडाउनका कारण समस्यामा परेकामध्ये ३ सय ९१ जनाले तत्काल नेपाल जाने इच्छा देखाएका छन् । विभिन्न काम विशेषले बेलायतमा रहेको भएपनि तत्काल नेपाल जानुपर्ने बाध्यता भएकामध्ये प्राथमिकता तय गर्दा ३ सय ९१ जनाले यथासक्य नेपाल फर्कने इच्छा व्यक्त गरेको यहाँस्थित नेपाली दुतावासले जनाएको छ ।

दुतावसले विगत २ सातायता नेपाल जान चाहनेहरुको तथ्यांक संकलन गरेको थियो । यसबीचमा दूतावासले सूचना सङ्कलन समिति गठन गरेर सोही समिति मार्फत तथ्यांक संकलन गरेकोमा ३ सय ९१ जनाले नेपाल जानका लागि भन्दै आफ्नो तथ्यांक भरेका छन् । यसरी फर्म भर्नेहरु सबैको तथ्यांक नेपालस्थित परराष्ट्रमन्त्रालयमा पठाइएको भएपनि उनीहरुलाई कहिले नेपाल फर्काइन्छ भन्ने विषयमा अहिलेसम्म कुनै जानकारी नभएको दूतावासको भनाई छ ।

**फाइल तस्वीर : लण्डनमा रहेको नेपाली दूतावास ।**

दुतावासले नेपाल फर्कन चाहनेको सूची नेपाल पठाएको र सरकारले निर्णय गरेर दुतावासलाई औपचारिक जानकारी नगराएसम्म फर्कने मितिको टुंगो नहुने स्पष्ट पारेको छ । दुतावासले दिएको जानकारी अनुसार हालसम्म निम्न अवस्थाका निम्न संख्याका व्यक्तिहरुले नेपाल फर्कनका लागि दूतावासमार्फत् सरकारलाई आग्रह गरेका छन् ।

१) भिसाको म्याद समाप्त भएका (जुनसम्म भिषा सकिनेसहित) १५४ जना
२) जागिर गुमाएका र वेरोजगार भएर घर फर्कन चाहने ९४ जना
३) विद्यार्थी भिषामा यहाँ आएका र पढाई पुरा गरेर फर्कन चाहने ५० जना
४) तालिम तथा सभा–समारोहमा भाग लिन आएका ५ जना
५) चिकित्सक तथा अन्य कर्मचारी २१ जना,
६) पारिवारिक एवं अन्य स्वास्थ्यसम्बन्धी समस्याका कारण फर्कन चाहनेहरु ६५ जना