फ्रान्समा कोरोना : बुधबार हाल सम्मकै सबैभन्दा धेरै १४ सय ३८ जनाको ज्यान गयो

Best Khabar Team | २०७७ बैशाख ३ गते बुधबार

१५ अप्रिल, २०२०
पेरिस । युरोपेली मुलुक फ्रान्समा कोरोना भाइसरको संक्रमणले भयाबह रुप लिँदै गएको छ । बुधबार फ्रान्समा हालसम्म सबैभन्दा धेरैको ज्यान गएको छ । कोरोनाका कारण बुधबार फ्रान्समा १ हजार ४ सय ३८ जनाले ज्यान गुमाएका छन् ।

यो संख्या फ्रान्समा कोरोनाबाट एकै दिन ज्यान गुमाएको हालसम्मको सबैभन्दा धेरै संख्या हो । यसअघि अप्रिल ७ का दिन फ्रान्समा १ हजार ४ सय १७ जनाले ज्यान गुमाएका थिए भने अप्रिल २ मा १ हजार ३ सय ५५ जनाको ज्यान कोरोनाको संक्रमणबाट गएको थियो । यस्तै अप्रिल ९ मा १ हजार ३ सय ४१ जनाले ज्यान गुमाएका थिए ।

अप्रिल ९ यता ज्यान गुमाउनेको संख्या निक्कै कम भएपनि आज फेरि ह्वात्तै बढेको छ । मृतक मध्ये ५ सय १४ जनाको अस्पतालमा र ९ सय २४ जनाको निजी निवास तथा बृद्दाश्रममा ज्यान गएको फ्रान्सका सञ्चारमाध्यमहरुले जनाएका छन् ।

फ्रान्समा हालसम्म कोरोना भाइरस संक्रमितको संख्या १ लाख ४७ हजार ८ सय ६३ पुगेको छ । यस्तै आज (बुधबार) मात्रै ४ हजार ५ सय ६० जना नयाँ संक्रमित भेटिएका छन् । फ्रान्समा हालसम्म कोरोनाका कारण १७ हजार १ सय ६७ जनाको ज्यान गएको छ । यस्तै ३० हजार ९ सय ५५ जना उपचारपछि घर फर्केका छन् । फ्रान्समा ६ हजार ४ सय भन्दा बढी गम्भीर विरामी छन् । फ्रान्स विश्वमै कोरोना प्रभावित चौथो राष्ट्र हो ।