समुदायमा कोरोना फैलिएको निष्कर्षसहित बिराटनगरमा आज रातिबाट पुनः लकडाउन गरिँदै

Best Khabar Team | २०७७ श्रावण १६ गते शुक्रबार

३१ जुलाई, २०२०
शनिश्चरे, मोरङ्ग । गएको साउन ८ गतेदेखि लकडाउन खुल्ला भएसँगै मानिसहरुको चहलपहल बढ्दा कोरोना संक्रमितको संख्या पनि बढ्न थालेपछि मोरङ्गको विराटनगर बजारमा फेरि लकडाउनको घोषणा गरिएको छ ।

आगामी दुई साताका लागि लागूहुने गरी आज राति १२ बजेपछि लकडाउन शुरु हुने विराटनगर उप महानगरपालिकाले जनाएको छ । पछिल्ला दिनमा कोरोना संक्रमितको संख्या बढ्नुका साथै कोरोनाले समुदायमा समेत प्रभाव फैलाउन थालेको निष्कर्षसहित स्थानीय कोरोना संकट व्यवस्थापन समितिले आज रातिबाट लागूहुने गरी लकडाउन शुरु गर्न लागेको हो । विराटनगरमा पछिल्ला दिनहरुमा भेटिएका कोरोना संक्रमितको संख्या र प्रकृति हेर्दा यो समुदायस्तरमै फैलिएको पुष्टि समितिले गरेको छ ।

लकडाउन गरिएसँगै चेकजाँच तथा यसबाट बच्नका लागि आवश्यक सबै पूर्वतयारीहरु र सावधानीहरु अपनाउन र यसलाई कडाईका साथ लागू गर्न अनुरोध गर्ने निर्णय पनि समितिले गरेको छ । लकडाउनका समयमा अत्याबश्यकीय सेवामा रहेका बाहेकका अन्य सवारी साधन र मानिसहरुलाई आवातजावतमा पूर्ण रोक लगाईने उपमहानगरपलिकाले जनाएको छ ।