१५ दिन थप भयो लकडाउन, जेठ २० सम्म कायम रहने

Best Khabar Team | २०२६ पुष १७ गते बिहिबार

१७ मे, २०२०
काठमाडौं । सरकारले कोरोना भाइरस (कोभिड १९)को संक्रमण फैलन नदिनका लागि आवश्यक तयारीका लागि भन्दै लकडाउनको समय फेरि लम्बाएको छ । नेपाल सरकार मन्त्रीपरिषद्को आज साँझ बसेको बैठकले आगामी जेठ २० गतेसम्मका लागि लकडाउनको समय लम्ब्याउने निर्णय गरेको मन्त्रीपरिषद् स्रोतले जानकारी दिएको छ ।

यसअघि गएको चैत्र ५ गतेदेखि सरकारले देशभर लकडाउन घोषणा गरेको थियो । पछिल्लो पटक थप भएको लकडाउनको समयावधि सकिन ३० घण्टा भन्दा कम समय बाँकी हुँदा सरकारले थप १५ दिन लकडाउन बढाउने घोषणा गरेको हो । यसपटक सरकारले लकडाउनलाई थप कडाई गर्ने निर्णय गरेको छ । सरकारको यो निर्णयसँगै अब जेठ २० गतेसम्म काठमाडौं उपत्यकालगायत देशका प्राय सबै क्षेत्रमा लकडाउन हुने भएको छ ।

यद्यपि लकडाउन जारी रहेपछि अवस्था हेरेर कम जोखिम रहेका हिमाली जिल्लाको जनजीवन सहज बनाउन सकिने विषयमा पनि मन्त्रीपरिषद्मा छलफल भएको छ । यसअघि कोरोना नियन्त्रण उच्चस्तरीय समितिको बैठकले कम्तीमा १० दिन लकडाउन लम्ब्याउन सरकारलाई सुझाव दिएको थियो । सरकारले समितिको सुझाव र पछिल्लो घटनाक्रमलाई मध्यनजर गर्दै थप १५ दिन लकडाउन थप्ने निर्णय गरेको हो ।

यसबीचमा लकडाउन खुकुलो बनाउने तयारीमा सरकार जुटेको भएपनि कोरोना संक्रमित बढ्न थालेपछि र कोरोनाका कारण मानिसको ज्यान नै जाने घटना भएपछि लकडाउन थप्नुको विकल्प नदेखिएका कारण १५ दिन थप गरिएको मन्त्रीपरिषद् स्रोतको भनाई छ ।