नेपाल प्रहरीको मुख्य कार्यालय काठमाडौंमा कार्यरत ४ प्रहरीमा कोरोना पुष्टि, अन्य केहीको रिपोर्ट आउन बाँकी

Best Khabar Team | २०२६ पुष १७ गते बिहिबार

२६ जुलाई, २०२०
काठमाडौं । काठमाडौंको नक्सालमा रहेको प्रहरी प्रधान कार्यालयमा कार्यरत चार जना प्रहरीमा कोरोना संक्रमण पुष्टि भएको छ । प्रहरी स्रोतका अनुसार प्रहरी प्रधान कार्यालय अन्र्तगतको सवारी शाखामा कार्यरत ४ जना प्रहरीमा २ दिनअघि गरिएको स्वाब परीक्षणको रिपोर्ट पोजेटिभ आएको हो । मुख्यालयमै गरिएको परीक्षणका क्रममा पोजेजिभ रिपोर्ट आएपछि यसको थप पुष्टिका लागि स्वाब टेकुमा रहेको राष्ट्रिय प्रयोगशालामा पठाइएकोमा त्यहाँबाट पनि पोजेटिभ रिपोर्ट आएको छ ।

उनीहरुको सम्पर्कमा रहेका अन्य केहीको पनि स्वाब परीक्षण भै रहेको र रिपोर्ट आउन बाँकी रहेको बताइएको छ । अहिले सवारी शाखाका ३ जनामा मात्रै कोरोना पुष्टि भएपनि उनीहरुको सम्पर्कमा रहेका अन्य शाखाका केही प्रहरी अधिकारीहरुमा पनि कोरोनासँग मिल्दोजुल्दो लक्षण देखिएका कारण संक्रमितको संख्या बढ्नसक्ने अनुमान गरिएको छ ।

संक्रमितहरुलाई अहिले प्रहरी अस्पतालको आइसोलेसनमा राखेर उपचार अघि बढाइएको छ भने उनीहरु कार्यरत शाखा र उनीहरुको सम्पर्कमा आएका अन्यलाई पनि प्रहरीले तयार पारेको क्वारेन्टाइनमा राख्ने तयारी भै रहेको छ । यो विषयमा स्वास्थ्य मन्त्रालयले यो समाचार तयार पार्दासम्म कुनै औपचारिक जानकारी सार्वजनिक गरेको छैन ।